Almatyda Disney stýdiiasynyń «Ańdar shahary-2» animatsiialyq filminiń qazaq tilindegi tusaýkeser kórsetilimi ótti. Oǵan elimizge tanymal tulǵalar, qoǵam qairatkerleri, kásipkerler men depýtattar, dýbliaj akterlary men blogerler, BAQ ókilderi qatysty, dep habarlaidy Dalanews.kz
Film elimizde 27 qarashadan bastap qazaq jáne orys tilderinde úlken ekrandardan kórsetiledi.
Bul – biyl Disney-diń qazaq tilinde «sóiletken» tórtinshi filmi. Filmderdi túrli elderge beiimdep, dýbliajdaý – Disney kompaniiasynda burynnan qalyptasqan úrdis. Disney jyl saiyn ár filmniń túrli tilderdegi 40-ǵa jýyq nusqasyn daiyndaidy. «Qazaq tili» qoǵamynyń uiytqy bolýymen byltyrdan bastap iri halyqaralyq stýdiialar álemdik premeralaryn qazaq tilinde usyna bastady. Osy bastama aiasynda Disney stýdiiasy 2024 jyly «Oijumbaq 2», «Moana 2», «Mýfasa. Arystan patsha» dep atalatyn úsh filmin qazaq tiline aýdaryp, dýbliaj jumystaryn qarjylandyrdy. Biyl «Aqshaqar», «Lilo men Stich», «Elio» týyndysy usynyldy.
«Endi «Ańdar shahary» syndy tanymal týyndynyń ekinshi bólimi qazaq tilinde kórsetiledi. Bul bizdiń mádeni keńistigimizdegi úlken ózgeristerdi kórsetetin mańyzdy oqiǵa. Álemdik deńgeidegi kontentti qazaqsha tamashalaý qalypty ári tamasha dástúrge ainalyp keledi. Bul animatsiialyq film álemniń qyryqqa jýyq tiline aýdaryldy. Qazaq tili osy iri tildermen bir qatarda tur. Disney sekildi álemdik stýdiialardyń óz týyndysyn qazaqsha sóiletýi – bizdiń qoǵamnyń mádeni talǵamynyń jáne tilge degen jańa ustanymnyń nátijesi. Dál osyndai jobalar tilimizdiń tabiǵi ortasyn keńeitýge zor yqpal etedi», - deidi Halyqaralyq «Qazaq tili» qoǵamynyń prezidenti Raýan Kenjehanuly.
