Búgin Quryltai otyrysynda depýtat Ekaterina Smyshliaeva kóppáterli turǵyn úilerdi basqarý júiesin jetildirýge qatysty depýtattyq saýalyn jariialady, dep habarlaidy dalanews.kz.
Onyń aitýynsha, turǵyn úidi basqarý salasynda áli de sheshimin tappaǵan máseleler bar. Ásirese turǵyn úilerdiń birinshi qabatynda ornalasqan kafe, meiramhana jáne basqa da kommertsiialyq nysandar turǵyndarǵa qolaisyzdyq týǵyzady.
«Mundai nysandardan shyǵatyn shý, jaǵymsyz iis jáne injenerlik júielerge túsetin qosymsha júkteme turǵyndardyń shaǵymyn kóbeitýde», – dedi depýtat.
Osyǵan bailanysty Ekaterina Smyshliaeva Úkimetke kóppáterli úilerdi basqarý tártibin jetildirý boiynsha birqatar usynys joldady. Atap aitqanda, ol menshik ieleri birlestikteri (OSI) tóraǵalaryn tsifrlyq júieler arqyly aýystyrý rásimin jeńildetýdi jáne kooperativterdiń (KSK) qaita tirkeý protsesin tolyq aiaqtaýdy usyndy.
Sonymen qatar depýtat turǵyndardyń daýys berýine arnalǵan tegin tsifrlyq servisti iske qosýdy, bankterdiń turǵyn úi shottaryna qoiatyn talaptaryn birizdendirýdi jáne turǵyn úilerdegi kommertsiialyq nysandarǵa qoiylatyn talaptardy kúsheitýdi usyndy.
Sondai-aq ol kópqabatty úilerge kúrdeli jóndeý jumystaryn júrgizýdi qarjylandyrý tetikterin keńeitý qajettigin atap ótti. Depýtattyń pikirinshe, bul sharalar turǵyn úi qoryn basqarý júiesiniń tiimdiligin arttyryp, turǵyndardyń múddesin qorǵaýǵa múmkindik beredi.
