Úkimet depýtattardyń meditsina qyzmetkerlerin qorǵaýǵa baǵyttalǵan túzetýlerin úsh ret qabyldaýdan bas tartqan adamnyń kim ekenin anyqtap jatyr, dep habarlaidy Dalanews.kz.
Nelikten depýtattardyń meditsina qyzmetkerlerin qorǵaýǵa arnalǵan túzetýlerin úsh ret qabyldamai tastaǵany qazir úkimette anyqtalyp jatyr. Bul týraly Premer-ministrdiń orynbasary Ermek Kósherbaev málimdedi.
22 shilde kúni Májilis depýtaty Ashat Aimaǵambetov parlament depýtattary Qylmystyq kodekske meditsina qyzmetkerlerine kúsh kórsetý úshin jaýapkershilikti kúsheitýge qatysty túzetýlerdi úsh ret usynǵanyn, alaida úkimet olardy qoldamaǵanyn aitqan bolatyn.
Kósherbaevtyń aitýynsha, ol Densaýlyq saqtaý ministrine depýtattardan ótinishterdiń qashan túskenin anyqtap berýdi suraǵan. Alaida ázirge jaýap almaǵan.
"Keshe (23 shilde – avt.) jariialanǵan aqparatty oqyǵan boida men ministrge qońyraý shaldym. Bul ótinishterdiń qashan bolǵanyn anyqtap berýin suradym. Aqpannan bastap, iaǵni men jumysqa kirisken ýaqyttan beri ondai ótinishter bolǵan joq. Biraq biz Ashat Aimaǵambetovpen bul máseleni kóktemde, osyndai birneshe shabýyl oryn alǵan kezde talqylaǵan edik. Bul taqyrypta bizde eshqandai qarama-qaishylyq nemese kózqaras aiyrmashylyǵy bolǵan joq. Biz mundai adamdarǵa qatysty eń qatań sharalar qoldaný qajet degenge tolyq kelistik", – dedi ol úkimettegi brifingte.
Kósherbaevtyń aitýynsha, úkimet "munyń bárin únsiz baqylap otyrǵan joq". Sáýirden bastap úkimet parlamentpen birlesip, jazany kúsheitýdiń ártúrli nusqalaryn qarastyrǵan.
Qaraǵandy men Qostanaida meditsina qyzmetkerlerine shabýyl jasalǵannan keiin Qasym-Jomart Toqaev meditsina qyzmetkerlerine jasalǵan shabýyldar úshin jazany kúsheitýdi tapsyrǵan. Qazaqstan Premer-ministri Oljas Bektenov meditsina qyzmetkerlerin qorǵaýǵa baǵyttalǵan zańǵa túzetýlerdi ázirleýge 10 kún ýaqyt bergen.
