Májilis depýtaty Rinat Zaiyt Nurbol Nazarbaevtyń bar múlkin tekserýdi surady, dep habarlaidy Dalanews.kz.
Ol Qazaqstan Respýblikasynyń Bas prokýrory Berik Noǵaiulyna saýal joldady. Depýtattyń sózine sensek, keshe ǵana Bolat Nazarbaevtyń uly Nurbol Nazarbaev sot sheshimimen 57 milliard teńge kólemindegi aktivinen aiyrylyp, memleket menshigine qaitarylǵan. Sonymen birge, oǵan 925 million teńge aiyppul jáne 230,4 million teńge aiypaqy salynǵan.
"Eń bastysy onyń barlyq bank shoty buǵattalyp, kompaniia kirisin jáne jeke múlkin basqarý quqyǵynan aiyryldy. Bul áýlettiń reiderlik jolmen ielengen bazarlary, sondai-aq, Almaty qalasy men oblysynda zańsyz alǵan jer telimderi týraly qoǵamda túrli derekter aitylyp júr. Ásirese, atyshýly "Altyn orda" bazaryna qatysy jii sóz bolady", - dedi ol.
Depýtat bul nysandardyń tárkilengen aktivterdiń qatarynda bar-joǵy ázirge belgisiz ekenin de aityp qaldy.
"Bul máselelerdiń naqty jai-japsary ashyq túrde jariialanbaǵan. Sot sheshimderi shyqqanymen, protsesterdiń jabyq túrde ótýi qoǵamda alańdaýshylyq týǵyzady. Óitkeni aktivterdiń qaitarylǵannan keiingi taǵdyry, olardyń halyqqa naqty paidasy, jumys oryndarynyń saqtalýy siiaqty máseleler túsiniksiz qalyp otyr", - dedi ol.
Rinat Zaiyt Bas prokýrorǵa mynadai saýaldar joldady:
- Nurbol Nazarbaevtyń ieligindegi kompaniialar men aktivterge túgendeme júrgizip, onyń zańdylyǵyn anyqtaý, zańsyzdaryn memleket menshigine qaitarý.
- Qaitarylǵan zańsyz aktivter jáne olardyń paidalanylýy boiynsha tolyq aqparatty jurtshylyqqa qoljetimdi etý.
- "Altyn orda" bazary jáne Almaty qalasy men oblysyndaǵy zańsyz ielengen jer telimderi boiynsha tergeýdi bastaý.
