ءماجىلىس دەپۋتاتى رينات زايىت نۇربول نازاربايەۆتىڭ بار مۇلكىن تەكسەرۋدى سۇرادى، دەپ حابارلايدى Dalanews.kz.
ول قازاقستان رەسپۋبليكاسىنىڭ باس پروكۋرورى بەرىك نوعايۇلىنا ساۋال جولدادى. دەپۋتاتتىڭ سوزىنە سەنسەك، كەشە عانا بولات نازاربايەۆتىڭ ۇلى نۇربول نازاربايەۆ سوت شەشىمىمەن 57 ميلليارد تەڭگە كولەمىندەگى اكتيۆىنەن ايىرىلىپ، مەملەكەت مەنشىگىنە قايتارىلعان. سونىمەن بىرگە، وعان 925 ميلليون تەڭگە ايىپپۇل جانە 230،4 ميلليون تەڭگە ايىپاقى سالىنعان.
"ەڭ باستىسى ونىڭ بارلىق بانك شوتى بۇعاتتالىپ، كومپانيا كىرىسىن جانە جەكە مۇلكىن باسقارۋ قۇقىعىنان ايىرىلدى. بۇل اۋلەتتىڭ رەيدەرلىك جولمەن يەلەنگەن بازارلارى، سونداي-اق، الماتى قالاسى مەن وبلىسىندا زاڭسىز العان جەر تەلىمدەرى تۋرالى قوعامدا ءتۇرلى دەرەكتەر ايتىلىپ ءجۇر. اسىرەسە، اتىشۋلى "التىن وردا" بازارىنا قاتىسى ءجيى ءسوز بولادى"، - دەدى ول.
دەپۋتات بۇل نىسانداردىڭ تاركىلەنگەن اكتيۆتەردىڭ قاتارىندا بار-جوعى ازىرگە بەلگىسىز ەكەنىن دە ايتىپ قالدى.
"بۇل ماسەلەلەردىڭ ناقتى جاي-جاپسارى اشىق تۇردە جاريالانباعان. سوت شەشىمدەرى شىققانىمەن، پروسەستەردىڭ جابىق تۇردە ءوتۋى قوعامدا الاڭداۋشىلىق تۋعىزادى. ويتكەنى اكتيۆتەردىڭ قايتارىلعاننان كەيىنگى تاعدىرى، ولاردىڭ حالىققا ناقتى پايداسى، جۇمىس ورىندارىنىڭ ساقتالۋى سياقتى ماسەلەلەر تۇسىنىكسىز قالىپ وتىر"، - دەدى ول.
رينات زايىت باس پروكۋرورعا مىناداي ساۋالدار جولدادى:
- نۇربول نازاربايەۆتىڭ يەلىگىندەگى كومپانيالار مەن اكتيۆتەرگە تۇگەندەمە جۇرگىزىپ، ونىڭ زاڭدىلىعىن انىقتاۋ، زاڭسىزدارىن مەملەكەت مەنشىگىنە قايتارۋ.
- قايتارىلعان زاڭسىز اكتيۆتەر جانە ولاردىڭ پايدالانىلۋى بويىنشا تولىق اقپاراتتى جۇرتشىلىققا قولجەتىمدى ەتۋ.
- "التىن وردا" بازارى جانە الماتى قالاسى مەن وبلىسىنداعى زاڭسىز يەلەنگەن جەر تەلىمدەرى بويىنشا تەرگەۋدى باستاۋ.
