Májilis depýtaty Ekaterina Smyshliaeva eldegi tsifrlandyrýdyń jetkiliksiz deńgeiine nazar aýdaryp, bul másele boiynsha premer-ministr Oljas Bektenovke depýtattyq saýal joldady, dep habarlaidy Dalanews.kz.
Smyshliaevanyń aitýynsha, memlekettik organdar qajetti derekterdiń nebári 50 paiyzdan sál astamyn ártúrli sapada tsifrlap úlgergen. Analizge súiengen depýtat bul deńgeidiń óte birkelki emestigin atap ótti: qarjy jáne ádilet salasynda tsifrlandyrý 90 paiyzdan assa, aýyl sharýashylyǵy, saýda, energetika, ekologiia jáne bilim berý salalarynda 30-40 paiyzdan aspaidy.
"Derekter áli de bytyrańqy. Ár vedomstvo "óziniń" bazasyn jinap, onymen bólispeidi. Bul "derekter feodalizmine" ákelip otyr. Kimniń, qandai tártippen derekterge qol jetkizýge quqyǵy bar ekeni anyqtalmaǵan. Sonyń saldarynan azamattar men biznes bir aqparatty on ret engizýge májbúr. Al "deldaldar" nemese "kómekshiler" resmi servister men uiymdarǵa qaraǵanda jyldamyraq qol jetkizedi", – dedi depýtat Májilistiń plenarlyq otyrysynda.
Depýtat derekter bazasynda kóp qaitalanatyn ári eskirgen málimetterdiń bar ekenin, olardyń sirek jańartylatynyn synǵa aldy. Mysaly, meditsinada bir patsienttiń birneshe kartasy bolýy múmkin, aýyl sharýashylyǵynda áli kúnge deiin "birneshe aýylda birden tirkelgen virtýaldy siyrlar" kezdesedi.
Smyshliaeva qaǵaz kóshirmelerge qatysty da syn aitty.
"Zańdar elektrondy qujatty qaǵaz qujatpen teńestirgenine qaramastan, is júzinde memlekettik organdar áli de qaǵaz kóshirmelerin suraidy. Onyń ústine, qaǵaz ben elektrondy nusqalardyń sáikestigi jii buzylyp, daýǵa sebep bolyp júr. Bul azamattardyń ómirin jeńildetpei, kerisinshe qiyndatady", – dedi ol.
Osyǵan bailanysty depýtat elektrondy qujattardyń qaǵaz kóshirmesin talap etýdi doǵarýdy usyndy.
"Ákimshilik-protsestik kodeks talaptaryna sáikes, bir aqparatty qaita-qaita suraý jáne qaǵaz kóshirmelerin talap etý tájiribesin alyp tastaý qajet dep sanaimyz", – dedi Smyshliaeva.
Depýtat kelesi bastamalardy ortaǵa saldy:
-
azamattyń tsifrlyq izderi men negizgi málimetterin jinaqtaityn "tsifrlyq ámiian" engizý;
-
ulttyq derekter birjasyn qurý;
-
derekterdi paidalaný tiimdiligin baǵalaý júiesin engizý;
-
derekterdi jinaý infraqurylymyn qarjylandyrýdy qamtamasyz etý.
