Jelide Dýbai shokoladynan keiin Shine Muscat dep atalatyn júzimniń jarnamasy jer jardy. Májilis depýtaty, tanymal bloger Dáýlet Muqaev jurtshylyqtyń bul áreketin synady, - dep habarlaidy Dalanews.kz.
Depýtat muny kórseqyzarlyq nemese marketing qurbany bolý dep baǵalady.
"Dýbai shokolady" degen shyǵyp edi, endi "káris júzimi" (Shein mýskat dei me) degen shyqty. Instaǵa kirip qalsań boldy, shyrt-pyrt dep jep otyrǵandar qatary kóbeidi. Sony jalpaq jurtqa jariialamai-aq jeýge bolady ǵoi... Kishkentai Dýbai shokoladynyń baǵasy 15-20 myń teńge bolyp edi, endi myna júzimniń kishkene bir bóligi 5-10 myń teńge desedi. "Aqsha joq-joq" deidi de, talap alyp jatyr halyq. Onyń quramynda ne bar, nesi paidaly, ne ziian, ol týraly basymyzdy aýyrtqymyz kelmeidi. Bastysy jurttan qalmaý kerek. Alla biledi, buny da 12/24 aiǵa bólip tóleitinder shyqsa tań qalmaimyn.
Aqshańyz artylyp jatsa, ala berińiz. Qarsylyǵym joq. Biraq elden, trendten qalmaiyn degen oi - ábestik. Odan da myna qońyr kúzde et jeńizder, sorpa ishińizder. Mine, naǵyz paidaly taǵam", - dedi ol.
Aita keteiik, buǵan deiin DALA INSIDE Dýbaidaǵy shokolad fabrikalary tolyq qýatta jumys istep jatqanyna, al olardyń ónimin qazaqtar talap áketip jatqany jóninde zertteý jariialaǵan edi.
"Dýbaidan jetkiziletin atyshýly shokoladtyń baǵasy 20 myń teńgege jetip otyr, al onyń shynaiy qundylyǵy bul somanyń jartysyna da tatymaidy.
Osynaý qubylys halyqtyń tutyný mádenietin ǵana emes, sonymen birge eldiń qarjylyq saýattylyǵy qandai deńgeide ekenin kórsetedi. Shokoladqa jumsalǵan 20 myń teńge, bir ǵana tutynýshy turǵysynan eleýli bolmaýy múmkin. Biraq, mundai tranzaktsiianyń sany eselengen saiyn, bul milliondaǵan teńgeniń shetelge aǵýyna alyp keledi. Sheteldik taýarǵa táýeldilik ulttyq kapitaldyń ishki naryqta turaqtaýyna kedergi jasaidy", - dep topshylaǵan edi arna.
