Jýyrda Prezident fýtbol klýbtaryn jekeshelendirýge qatysty tapsyrma berdi. Májilis depýtaty Nartai Sársenǵaliev osy týrasynda pikir bildirip, budan biýdjet esebin túgendeitinimizdi aitty, - dep habarlaidy Dalanews.kz.
Depýtat fýtboldyń háli múshkil ekenin aityp, "álemdegi beldi dop dodasyna joldama alǵan jalǵyz klýb qalǵandaryna qorǵan bola almaidy" degen pikirin jetkizdi.
"Memleket basshysy joldaýynda: "Fýtbol klýbtaryn jekeshelendirýge qatysty jumysty tezdetý kerek. Mundai qadamsyz Qazaqstanda fýtbol damymaitynyn álemdik tájiribeden kórip otyrmyz" dedi. Rasynda, qazaqstandyq fýtbol klýbtary qaqpaǵa gol salýdan góri, qazynaǵa qol salýdy jaqsy meńgergen. Al biz olardyń biýdjetke talasqandai jasyl alańda dopqa talasqanyn qalaimyz. Sebebi qazirgi nátijeleri qaryn ashyrady", - dedi ol.
Nartai Sársenǵalievtiń aitýynsha, 2024 jyly Qazaqstandaǵy 13 fýtbol klýbyn qarjylandyrýǵa 27,3 mlrd teńge jumsalǵan.
"Qyrýar aqsha. Biýdjet tapshy bop jatqanda fýtbolǵa aqsha taba qalatyn óńir basshylarynyń sheshimin shynymen túsinbeimiz. Sebebi biyl da aiaqdop aiamai asapty. Mysaly 2025 jyly premer-ligada dop tebetin "Ordabasy" fýtbol klýbyna 3,2 milliard teńge bólingen. "Aqtóbe" fýtbol klýbyna 2,1 milliard teńge, "Qyzyl-Jar" klýbyna 2 milliard teńge berilgen. Jalpy premer-ligada oinaityn fýtbol klýbynyń bári biýdjetten aqsha alady", - dedi ol.
Depýtattyń aitýynsha, "Astana" fýtbol klýby "Samuryq-Qazynadan" 2025 jylǵa 5,3 milliard teńge alǵan.
"Munsha aqshany aiaqdoptyń aiaǵyna tastaý aqylǵa syimaidy. Ol ol ma, birinshi ligadaǵy fýtbol klýbtaryna da biýdjetten qyrýar aqsha beriledi, aldy jylyna 1,2 milliard teńgeden alǵan. Jalpy esebin aitsam, 2025 jyly premer-liga fýtbol klýbtaryna 24 milliard teńge, birinshi ligadaǵy fýtbol klýbtaryna 7,7 milliard teńge berilgen. Sáikesinshe Qazaqstannyń qambasynan 2025 jyly fýtbolǵa 31 799 143 000 teńge jumsaldy dep resmi aitýǵa bolady", - dedi ol.
Depýtat "fýtbol klýbtaryn jekege bersek, keminde osynsha qarajatty únemdep, ony muqtaj salaǵa salýǵa bolady" degen pikir bildirdi.
Budan bólek Nartai Sársenǵaliev sport salasyndaǵy jattyqtyrýshylardyń jalaqysyn kóterýdi usyndy. Onyń sózinshe, 2025 jyly eńbek jolyn endi bastaǵan jattyqtyrýshy 117 myń teńge alsa, joǵary sanatty jattyqtyrýshy 145 115 teńgege kún kórýge májbúr.
