Жуырда Президент футбол клубтарын жекешелендіруге қатысты тапсырма берді. Мәжіліс депутаты Нартай Сәрсенғалиев осы турасында пікір білдіріп, бұдан бюджет есебін түгендейтінімізді айтты, - деп хабарлайды Dalanews.kz.
Депутат футболдың хәлі мүшкіл екенін айтып, "әлемдегі белді доп додасына жолдама алған жалғыз клуб қалғандарына қорған бола алмайды" деген пікірін жеткізді.
"Мемлекет басшысы жолдауында: "Футбол клубтарын жекешелендіруге қатысты жұмысты тездету керек. Мұндай қадамсыз Қазақстанда футбол дамымайтынын әлемдік тәжірибеден көріп отырмыз" деді. Расында, қазақстандық футбол клубтары қақпаға гол салудан гөрі, қазынаға қол салуды жақсы меңгерген. Ал біз олардың бюджетке таласқандай жасыл алаңда допқа таласқанын қалаймыз. Себебі қазіргі нәтижелері қарын ашырады", - деді ол.
Нартай Сәрсенғалиевтің айтуынша, 2024 жылы Қазақстандағы 13 футбол клубын қаржыландыруға 27,3 млрд теңге жұмсалған.
"Қыруар ақша. Бюджет тапшы боп жатқанда футболға ақша таба қалатын өңір басшыларының шешімін шынымен түсінбейміз. Себебі биыл да аяқдоп аямай асапты. Мысалы 2025 жылы премьер-лигада доп тебетін "Ордабасы" футбол клубына 3,2 миллиард теңге бөлінген. "Ақтөбе" футбол клубына 2,1 миллиард теңге, "Қызыл-Жар" клубына 2 миллиард теңге берілген. Жалпы премьер-лигада ойнайтын футбол клубының бәрі бюджеттен ақша алады", - деді ол.
Депутаттың айтуынша, "Астана" футбол клубы "Самұрық-Қазынадан" 2025 жылға 5,3 миллиард теңге алған.
"Мұнша ақшаны аяқдоптың аяғына тастау ақылға сыймайды. Ол ол ма, бірінші лигадағы футбол клубтарына да бюджеттен қыруар ақша беріледі, алды жылына 1,2 миллиард теңгеден алған. Жалпы есебін айтсам, 2025 жылы премьер-лига футбол клубтарына 24 миллиард теңге, бірінші лигадағы футбол клубтарына 7,7 миллиард теңге берілген. Сәйкесінше Қазақстанның қамбасынан 2025 жылы футболға 31 799 143 000 теңге жұмсалды деп ресми айтуға болады", - деді ол.
Депутат "футбол клубтарын жекеге берсек, кемінде осынша қаражатты үнемдеп, оны мұқтаж салаға салуға болады" деген пікір білдірді.
Бұдан бөлек Нартай Сәрсенғалиев спорт саласындағы жаттықтырушылардың жалақысын көтеруді ұсынды. Оның сөзінше, 2025 жылы еңбек жолын енді бастаған жаттықтырушы 117 мың теңге алса, жоғары санатты жаттықтырушы 145 115 теңгеге күн көруге мәжбүр.
