Májilis depýtaty Dáýlet Turlyhanovtyń ulyna qatysty is boiynsha úkim ózgerdi, - dep habarlaidy Dalanews.kz.
Nurasyl Bolatqa qatysty qylmystyq is Joǵarǵy sotta qaraldy. 2023 jyldyń qazan aiynda Almaty garnizony Áskeri sotynyń úkimimen Nurasyl Bolat erli-zaiypty O.Chernov pen A.Chernovanyń densaýlyǵyna qasaqana aýyrlyǵy ortasha ziian keltirgeni úshin Qylmystyq kodekstiń 107-baby 2-bóligi 1), 5) tarmaqtary boiynsha sottalǵan bolatyn.
Sot úkimimen 500 AEK (1 725 000 teńge) kóleminde aiyppul túrinde jaza taǵaiyndaldy. Sondai-aq, jábirlenýshilerdiń paidasyna 500 myń teńge moraldyq shyǵyn jáne ókildiń qyzmetine ótemaqy tóleýge ketken 1 600 000 teńge óndirildi.
Apelliatsiialyq saty sot úkimin ózgertip, Nurasyn Bolattan jábirlenýshilerdiń paidasyna apelliatsiialyq satydaǵy sotqa qatysý úshin ókildiń qyzmetine 400 000 teńge kóleminde shyǵyn óndirildi.
Kassatsiialyq sot otyrysy jábirlenýshilerdiń ótinishhaty boiynsha ótti, olar sot aktilerin ózgertip, oǵan bas bostandyǵynan aiyrý jazasyn taǵaiyndaýdy surady.
"Qylmystyq isti qaraý nátijeleri boiynsha Joǵarǵy sottyń qylmystyq ister jónindegi sot alqasy sot aktilerin ózgertip, N.Bolatqa 2 jylǵa bas bostandyǵyn shekteý jazasy taǵaiyndaldy, sondai-aq, árqaisysyna 1 million teńgege deiin moraldyq zalaldyń ótemaqy mólsheri ósti", - dep jazylǵan málimette.
Buǵan deiin zańger Anna Chernova áleýmettik jelide depýtat Dáýlet Turlyhanovtyń ulyna qatysty úkim qaita qaralatynyn málimdedi. Ol Májilis depýtaty ári tanymal qazaq balýany Dáýlet Turlyhanovtyń ulynan soqqy jegen bolatyn.
"Joǵarǵy sotta Májilis depýtaty Dáýlet Turlyhanovtyń ulyna qatysty bizdiń is boiynsha áskeri sot úkimi qaita qaralady. Áskeri sottyń úkimimen ol buzaqylyq nietpen eki adamnyń densaýlyǵyna qasaqana ortasha ziian keltirgeni úshin 107-baptyń 2-bóligi 1),5) tarmaǵy boiynsha 500 AEK kóleminde jaza aldy. Úkim óte jeńil túrde taǵaiyndaldy. Áskeri bólimdi tastap ketkeni, berilgen antty buzǵany, qylmys jasalǵan sátte ishimdikke mas bolǵany úshin qaitalap jazalaý túrindegi jazany aýyrlatatyn mán-jailar esepke alynbaǵan.
...Bizdiń oqiǵamyzda ádildik ornaitynyna úmittenemin! Bári áleýmettik jaǵdaiy men mártebesine qaramastan zań men sot aldynda teń!" - dedi ol.
Aita keteiik, Almatyda áskeri qyzmetker belgili advokatty soqqyǵa jyqqan bolatyn. Bul oqiǵa byltyr 11 aqpanǵa qaraǵan túni Almatynyń saýda ortalyqtarynyń biriniń mańyndaǵy parkingte boldy. Is halyq tarapynan qoǵamdyq daý týdyrdy. Bul oqiǵa týraly advokat Oleg Chernovtyń áieli Anna Dimitrievich Facebook paraqshasynda jazdy.
Almaty Politsiia departamenti sol kezde bul derek QR Qylmystyq kodeksiniń 293-baby "Buzaqylyq" boiynsha sotaldy tergeýdiń biryńǵai tizilimine tirkelgenin habarlady.
Al keiin advokatty soqqyǵa jyqqan áskeri qyzmetker grek-rim kúresinen qazaqstandyq jáne burynǵy Keńes Odaǵynyń palýany Dáýlet Turlyhanovtyń uly bolyp shyqty. Bul aqparatty depýtat Turlyhanovtyń ózi rastaǵan bolatyn. Ol ulyna qatysty daýǵa kózqarasyn bildirip, keshirim surady.
