Májilis depýtaty Baqytjan Bazarbek «SK-Farmatsiia» JShS-ne júrgizilgen tekserýler barysynda anyqtalǵan túrli derekterge bailanysty Bas prokýratýraǵa birden tórt aryz daiyndap jatqanyn málimdedi, dep habarlaidy Dalanews.kz.
Maýsym aiynyń basynda depýtat Bazarbek «SK-Farmatsiia» basshylaryna qatysty qylmystyq quqyqbuzýshylyq belgileri bar bolsa da, tek qyzmetinen bosatylǵany túsiniksiz ekenin aityp, bul máselege qatysty Antikorǵa, Qarjylyq monitoring agenttigine jáne Bas prokýratýraǵa aryzdanatynyn málimdegen edi.
"Qazir men Joǵarǵy aýditorlyq palatasynyń farmatsevtika salasyna, naqtyraq aitqanda “SK-Farmatsiia” men ózge de iri farmatsevtikalyq kompaniialardyń qyzmetine júrgizgen aýditiniń nátijesi boiynsha Bas prokýratýraǵa aryz daiyndap jatyrmyn", – dedi depýtat úkimet kýlýarynda.
Baqytjan Bazarbektiń aitýynsha, ol tek bir ǵana aryzben shektelmeidi.
"Budan bólek, mindetti áleýmettik meditsinalyq saqtandyrý júiesine qatysty qarjy jymqyrǵan sýbektiler boiynsha jeke aryz, aýyl sharýashylyǵyndaǵy sýbsidiialar boiynsha jeke aryz jáne úkimettiń esebine qatysty jeke aryz ázirlenip jatyr. Esterińizde bolsa, biz 27 maýsymda úkimettiń esebin maquldadyq. Soǵan da bailanysty aryz daiyndalýda. Bul aryz shilde aiynyń sońynda joldanady", – dedi májilismen.
Onyń aitýynsha, jalpy tórt aryz josparlanǵan.
"Bul tórt aryzdy besinshi sessiia aiaqtalǵanǵa deiin sońyna deiin jetkizemin. Bas prokýratýramen tyǵyz jumys isteimin. Qylmystyq ister qozǵalyp, tergeý men áshkereleý jumystary júrmeiinshe, kinálilerdi tutqynǵa almaiynsha toqtamaimyz", – dep túiindedi depýtat Baqytjan Bazarbek.
Aita keteiik, «SK-Farmatsiia» – Qazaqstanda mindetti áleýmettik meditsinalyq saqtandyrý men tegin meditsinalyq kómektiń kepildendirilgen kólemi aiasynda dári-dármek pen meditsinalyq buiymdardy satyp alý, saqtaý jáne jetkizýge jaýapty biryńǵai distribiýtor.
Eske salaiyq, buǵan deiin depýtat Baqytjan Bazarbek «SK-Farmatsiiaǵa» qarsy qylmystyq is qozǵaýdy talap etken bolatyn.
Onyń aitýynsha, kompaniia jumysyna engizilgen jańa tásilder eshqandai oń nátije bermei, kerisinshe, dári-dármek baǵasynyń eki esege kóterilýine jáne 14 milliard teńgeden astam shyǵynǵa ákelgen.
Sondai-aq depýtat Densaýlyq saqtaý ministrligi tarapynan logistikalyq qyzmetterdi satyp alýdyń jańa modeline qatysty sheshimderdiń ýaqytyly qabyldanbaýy saldarynan, 2025 jyldyń alǵashqy tórt aiynda memleket 748 million teńge únemdei almady dep málimdedi.
