Depýtat Baqytjan Bazarbek zańsyz berilgen jer telimderine qatysty bastalǵan tekseristerdi toqtatýǵa jáne qysym kórsetýge talpynyp júrgenderge qatań eskertý jasady. Bul týraly ol óziniń resmi málimdemesinde aitty, dep habarlaidy Dalanews.kz.
Bazarbektiń aitýynsha, tekseristerge “joǵarydan telefon soǵý”, jeke ótinishter nemese shaǵym jazýmen áser etýge tyrysatyndar óz jaǵdailaryn ýshyqtyra túsedi.
“Eger bireý maǵan qysym kórsetip, tekseristerdi toqtata alamyn dep oilasa, bul bos áýreshilik ári óte qaýipti. Tájiribe kórsetkendei, jumysyma kedergi keltirýge tyrysqandardyń jaǵdaiy tek nasharlai túsedi. Mundai nietpen maǵan jolamaýdy eskertemin”, – dedi depýtat.
Onyń sózinshe, 2025 jyldyń mamyr aiynan beri ol Bas prokýratýraǵa birneshe ret resmi ótinish joldap, KÝZR MSH men MVRI-men birlesip 14 iri tekseris bastaǵan.
“Olardyń qatarynda:
• Aqshi aýylyndaǵy 352 kommertsiialyq jer telimi, 151-inde zańbuzýshylyq anyqtaldy, qalǵandary boiynsha tekseris jalǵasýda;
• Sarqand aýdanyndaǵy 10 000 gektar aýyl sharýashylyǵy jeri boiynsha sotqa talap-aryzdar berildi;
• Qapshaǵai jaǵalaýyndaǵy 82 kommertsiialyq ýchaske – 51-i boiynsha buzýshylyq rastaldy, sotqa daiyndyq júrgizilýde;
• Qarasai aýdanyndaǵy jalǵan qujattar arqyly bólingen aýylsharýashylyq jerleri, qylmystyq is qozǵaldy;
• Almatynyń taý bóktkerinde zańsyz úi salý jáne sailardy kómý faktileri – shamamen 100 ýchaske tekserilýde, zańbuzýshylyqtar anyqtalýda”, - deidi ol.
Baqytjan Bazarbek barlyq bastamany Bas prokýratýra men óziniń jeke baqylaýynda ekenin atap ótti.
“Ár ýchaskeniń artynda “tanystar” men yqpaldy adamdar turǵany belgili. Biraq bul eshkimdi jaýapkershilikten qutqara almaidy. Zańsyz berilgen jerlerdi memleketke qaitaramyz. Sý qorǵaý aimaqtary, taý bókteri, qorǵalatyn aýmaqtarda salynǵan zańsyz qurylys túgel súriledi”, – dedi ol.
Sondai-aq depýtat qujattarǵa zańsyz qol qoiǵan memlekettik qyzmetkerler de mindetti túrde jaýapqa tartylatynyn jetkizdi.
“Eger búgin bolmasa, erteń. Erteń bolmasa, zań múmkindik bergen kúni báribir kelemiz. Árqaisyna. Múmkindikterimiz de, erkimiz de jetkilikti. Bul – bastamasy ǵana", – dedi depýtat.
Depýtattyń málimdemesi jer salasyndaǵy zańsyzdyqtardy túbegeili joiýǵa baǵyttalǵan qatań ustanymyn kórsetedi.
