دەپۋتات باقىتجان بازاربەك زاڭسىز بەرىلگەن جەر تەلىمدەرىنە قاتىستى باستالعان تەكسەرىستەردى توقتاتۋعا جانە قىسىم كورسەتۋگە تالپىنىپ جۇرگەندەرگە قاتاڭ ەسكەرتۋ جاسادى. بۇل تۋرالى ول ءوزىنىڭ رەسمي مالىمدەمەسىندە ايتتى، دەپ حابارلايدى Dalanews.kz.
بازاربەكتىڭ ايتۋىنشا، تەكسەرىستەرگە “جوعارىدان تەلەفون سوعۋ”، جەكە وتىنىشتەر نەمەسە شاعىم جازۋمەن اسەر ەتۋگە تىرىساتىندار ءوز جاعدايلارىن ۋشىقتىرا تۇسەدى.
“ەگەر بىرەۋ ماعان قىسىم كورسەتىپ، تەكسەرىستەردى توقتاتا الامىن دەپ ويلاسا، بۇل بوس اۋرەشىلىك ءارى وتە ءقاۋىپتى. تاجىريبە كورسەتكەندەي، جۇمىسىمa كەدەرگى كەلتىرۋگە تىرىسقانداردىڭ جاعدايى تەك ناشارلاي تۇسەدى. مۇنداي نيەتپەن ماعان جولاماۋدى ەسكەرتەمىن”، – دەدى دەپۋتات.
ونىڭ سوزىنشە، 2025 جىلدىڭ مامىر ايىنان بەرى ول باس پروكۋراتۋراعا بىرنەشە رەت رەسمي ءوتىنىش جولداپ، كۋزر مسح مەن مۆري-مەن بىرلەسىپ 14 ءىرى تەكسەرىس باستاعان.
“ولاردىڭ قاتارىندا:
• اقشي اۋىلىنداعى 352 كوممەرسيالىق جەر تەلىمى، 151-ىندە زاڭبۇزۋشىلىق انىقتالدى، قالعاندارى بويىنشا تەكسەرىس جالعاسۋدا؛
• سارقاند اۋدانىنداعى 10 000 گەكتار اۋىل شارۋاشىلىعى جەرى بويىنشا سوتقا تالاپ-ارىزدار بەرىلدى؛
• قاپشاعاي جاعالاۋىنداعى 82 كوممەرسيالىق ۋچاسكە – 51ء-ى بويىنشا بۇزۋشىلىق راستالدى، سوتقا دايىندىق جۇرگىزىلۋدە؛
• قاراساي اۋدانىنداعى جالعان قۇجاتتار ارقىلى بولىنگەن اۋىلشارۋاشىلىق جەرلەرى، قىلمىستىق ءىس قوزعالدى؛
• الماتىنىڭ تاۋ بوكتكەرىندە زاڭسىز ءۇي سالۋ جانە سايلاردى كومۋ فاكتىلەرى – شامامەن 100 ۋچاسكە تەكسەرىلۋدە، زاڭبۇزۋشىلىقتار انىقتالۋدا”، - دەيدى ول.
باقىتجان بازاربەك بارلىق باستامانى باس پروكۋراتۋرا مەن ءوزىنىڭ جەكە باقىلاۋىندا ەكەنىن اتاپ ءوتتى.
“ءار ۋچاسكەنىڭ ارتىندا “تانىستار” مەن ىقپالدى ادامدار تۇرعانى بەلگىلى. ءبىراق بۇل ەشكىمدى جاۋاپكەرشىلىكتەن قۇتقارا المايدى. زاڭسىز بەرىلگەن جەرلەردى مەملەكەتكە قايتارامىز. سۋ قورعاۋ ايماقتارى، تاۋ بوكتەرى، قورعالاتىن اۋماقتاردا سالىنعان زاڭسىز قۇرىلىس تۇگەل سۇرىلەدى”، – دەدى ول.
سونداي-اق دەپۋتات قۇجاتتارعا زاڭسىز قول قويعان مەملەكەتتىك قىزمەتكەرلەر دە مىندەتتى تۇردە جاۋاپقا تارتىلاتىنىن جەتكىزدى.
“ەگەر بۇگىن بولماسا، ەرتەڭ. ەرتەڭ بولماسا، زاڭ مۇمكىندىك بەرگەن كۇنى ءبارىبىر كەلەمىز. ءارقايسىنا. مۇمكىندىكتەرىمىز دە، ەركىمىز دە جەتكىلىكتى. بۇل – باستاماسى عانا"، – دەدى دەپۋتات.
دەپۋتاتتىڭ مالىمدەمەسى جەر سالاسىنداعى زاڭسىزدىقتاردى تۇبەگەيلى جويۋعا باعىتتالعان قاتاڭ ۇستانىمىن كورسەتەدى.
