Onyń pikirinshe ǵylym salasy daý-damaiǵa shyrmalǵan. Salaǵa serpilis qajet, alaida buǵan jaýapty azamattardyń jaltaqtyǵynan kúrdeli ózgerister keiinge shegerilip otyr.
"Tamyr-tanysy barlarǵa grant taratý "dástúri" áli tyiylǵan joq. Orta bilimniń ahýaly tipten múshkil. Oqýshylar arasynda bilim alýda ala-qulalyq paida boldy. Keibireýi orta bilimnen qol úzip qaldy. Indet aýa jaiylǵaly bilim sapasy kúrt quldyrap ketti. Bul kimge tiimdi boldy eken? Aqyr sońy sorlaityn halyq. Ainalyp kelgende halyq utyldy", – deidi halyq qalaýlysy.
Smirnova barsha ata-analardyń bilikti, isker mamanǵa muhtaj ekenin aitady. Alaida pandemiia kesirinen ustazdardyń kópshiligi jumys tásilin ózgertýge májbúr bolǵan.
"Qazirgidei qym-qýyt shaqta izdeniske qaidan oryn bolsyn? Ustazdardyń shabytyn sóndirip, shyǵarmashylyǵyn shektegen qatań buiryqtyń jaǵdaiynda balaǵa jóndi bilim berile me? Tóbedegi uiymdardyń bilim berýdegi ashyqtyq pen shyǵarmashylyq erkindikke tumsyq tyǵyp, talabyna kóndirýge tyrysýy ustazdardyń izdeniske umtylysyn tejep tastady.
Saladaǵy jartykesh jobalardan aiaq alyp júre almaisyń. "Kúndeligi" qalyp, "Sfera" degeni paida shyqty. Balanyń basyn qatyryp, ustazdy ábigerge salatyn mundai qisynsyz jobalardyń artynda shalaǵai sheshimder tur.
"Sferasy isten shyǵyp, "Kúndelikti" kádege asyra almaǵan ustazdar amalsyzdan ýatsapqa kirip, ótken sabaqty ZOOM arqyly qaitara túsindirýge májbúr", – deidi Smirnova.
Depýtat Bilim ministrligindegi pedagog diplomy bar áriptesterine túkpirdegi aýdan-aýyldarǵa baryp sabaq ótkizýge, osy arqyly ustaz qaýymynyń jaǵdaiyn kózben kórýge keńes beripti.
"Men de muǵalimmin. Mamandyǵym - biolog. Aimaǵambetov - tarihshy. Vitse-ministrlerdiń de muǵalim diplomy bar. Endeshe, ne turys? Kez-kelgen mektepke baryp, óz pánimiz boiynsha kúnine 5 sabaq ótkizeiik. Bir orynda aialdap qalmai, kelesi kúni basqa mektepke bas suǵaiyq. Synyptaǵy jaǵdaimen jaqyn tanysaiyq. "Kúndelikti" qoldanyp kóreiik. "Sferanyń" sapasyn teksereiik. Mine, sol kezde Bilim ministrligi usynǵan platformalardyń paidasy bar ma, joq pa naqty biletin bolamyz.
Sol kezde ǵana ustaz eńbegin shynaiy baǵalaýdy úirenemiz. Muǵalimder bilim salasynyń barsha aýyrtpalyǵyn moiymai kóterýde. Qatań, qasań talapqa tóselýden ózge amaly joq. Ministrliktegiler ustazdyń jaǵdaiyn kózben kórip, tikelei tanysýy kerek. Aryz-qaryzyna qulaq túrip, eldiń aldynda aq-adal bolǵany jón", – deidi halyq qalaýlysy.
