ونىڭ پىكىرىنشە عىلىم سالاسى داۋ-دامايعا شىرمالعان. سالاعا سەرپىلىس قاجەت، الايدا بۇعان جاۋاپتى ازاماتتاردىڭ جالتاقتىعىنان كۇردەلى وزگەرىستەر كەيىنگە شەگەرىلىپ وتىر.
"تامىر-تانىسى بارلارعا گرانت تاراتۋ "ءداستۇرى" ءالى تىيىلعان جوق. ورتا ءبىلىمنىڭ احۋالى تىپتەن مۇشكىل. وقۋشىلار اراسىندا ءبىلىم الۋدا الا-قۇلالىق پايدا بولدى. كەيبىرەۋى ورتا بىلىمنەن قول ءۇزىپ قالدى. ىندەت اۋا جايىلعالى ءبىلىم ساپاسى كۇرت قۇلدىراپ كەتتى. بۇل كىمگە ءتيىمدى بولدى ەكەن؟ اقىر سوڭى سورلايتىن حالىق. اينالىپ كەلگەندە حالىق ۇتىلدى"، – دەيدى حالىق قالاۋلىسى.
سميرنوۆا بارشا اتا-انالاردىڭ بىلىكتى، ىسكەر مامانعا مۇحتاج ەكەنىن ايتادى. الايدا پاندەميا كەسىرىنەن ۇستازداردىڭ كوپشىلىگى جۇمىس ءتاسىلىن وزگەرتۋگە ءماجبۇر بولعان.
"قازىرگىدەي قىم-قۋىت شاقتا ىزدەنىسكە قايدان ورىن بولسىن؟ ۇستازداردىڭ شابىتىن ءسوندىرىپ، شىعارماشىلىعىن شەكتەگەن قاتاڭ بۇيرىقتىڭ جاعدايىندا بالاعا ءجوندى ءبىلىم بەرىلە مە؟ توبەدەگى ۇيىمداردىڭ ءبىلىم بەرۋدەگى اشىقتىق پەن شىعارماشىلىق ەركىندىككە تۇمسىق تىعىپ، تالابىنا كوندىرۋگە تىرىسۋى ۇستازداردىڭ ىزدەنىسكە ۇمتىلىسىن تەجەپ تاستادى.
سالاداعى جارتىكەش جوبالاردان اياق الىپ جۇرە المايسىڭ. "كۇندەلىگى" قالىپ، "سفەرا" دەگەنى پايدا شىقتى. بالانىڭ باسىن قاتىرىپ، ۇستازدى ابىگەرگە سالاتىن مۇنداي قيسىنسىز جوبالاردىڭ ارتىندا شالاعاي شەشىمدەر تۇر.
"سفەراسى ىستەن شىعىپ، "كۇندەلىكتى" كادەگە اسىرا الماعان ۇستازدار امالسىزدان ۋاتساپقا كىرىپ، وتكەن ساباقتى ZOOM ارقىلى قايتارا تۇسىندىرۋگە ءماجبۇر"، – دەيدى سميرنوۆا.
دەپۋتات ءبىلىم مينيسترلىگىندەگى پەداگوگ ديپلومى بار ارىپتەستەرىنە تۇكپىردەگى اۋدان-اۋىلدارعا بارىپ ساباق وتكىزۋگە، وسى ارقىلى ۇستاز قاۋىمىنىڭ جاعدايىن كوزبەن كورۋگە كەڭەس بەرىپتى.
"مەن دە ءمۇعالىممىن. ماماندىعىم - بيولوگ. ايماعامبەتوۆ - تاريحشى. ۆيسە-مينيسترلەردىڭ دە ءمۇعالىم ديپلومى بار. ەندەشە، نە تۇرىس؟ كەز-كەلگەن مەكتەپكە بارىپ، ءوز ءپانىمىز بويىنشا كۇنىنە 5 ساباق وتكىزەيىك. ءبىر ورىندا ايالداپ قالماي، كەلەسى كۇنى باسقا مەكتەپكە باس سۇعايىق. سىنىپتاعى جاعدايمەن جاقىن تانىسايىق. "كۇندەلىكتى" قولدانىپ كورەيىك. "سفەرانىڭ" ساپاسىن تەكسەرەيىك. مىنە، سول كەزدە ءبىلىم مينيسترلىگى ۇسىنعان پلاتفورمالاردىڭ پايداسى بار ما، جوق پا ناقتى بىلەتىن بولامىز.
سول كەزدە عانا ۇستاز ەڭبەگىن شىنايى باعالاۋدى ۇيرەنەمىز. مۇعالىمدەر ءبىلىم سالاسىنىڭ بارشا اۋىرتپالىعىن مويىماي كوتەرۋدە. قاتاڭ، قاساڭ تالاپقا توسەلۋدەن وزگە امالى جوق. مينيسترلىكتەگىلەر ۇستازدىڭ جاعدايىن كوزبەن كورىپ، تىكەلەي تانىسۋى كەرەك. ارىز-قارىزىنا قۇلاق ءتۇرىپ، ەلدىڭ الدىندا اق-ادال بولعانى ءجون"، – دەيدى حالىق قالاۋلىسى.
