Májilis depýtaty Ardaq Nazarov keıingi jyldary áskerge shaqyrý naýqany kezinde qıyndyqtar baıqalyp, buǵan ata-analar da alańdaýshylyq bildirip otyrǵanyn jetkizdi, dep habarlaıdy Dalanews.kz.
Onyń sózinshe, mundaı jaǵdaı jastardyń azamattyq boryshyn óteýge degen qyzyǵýshylyǵyna áser etýi de múmkin. Ol álem elderinen mysal keltirdi:
- Ońtústik Koreıada áskerı boryshyn ótegen azamattar eńbek naryǵynda basymdyqqa ıe.
- Fınlándıa men Norvegıada áskerı qyzmet tek jaýyngerlik daıyndyqpen shektelmeı, jastarǵa İT, medısına, ınjenerıa syndy zamanaýı salada daǵdy berýge baǵyttalǵan.
- Túrkıa Qarýly Kúshteri qýaty jaǵynan NATO-da ekinshi, al álemde alǵashqy jetilikke kiredi.
"Bul deńgeıge tek zamanaýı qarý-jaraqpen emes, halyqtyń armıaǵa degen senimi men jastardyń patrıottyq rýhynyń nátjesinde jetti. Túrkıa jastary úshin áskerı borysh tek zańmen belgilengen mindet emes, sonymen qatar, Otandy qorǵaý jolyndaǵy azamattyq paryz retinde qarastyrylady. Buǵan sebep bolatyn jaǵdaı: áskerden keıin memlekettik qyzmet pen bilim salasynda, áleýmettik qoldaý baǵdarlamasynda belgili bir artyqshylyqqa ıe", - dedi depýtat.
Ardaq Nazarov jastardy tek áskerı daıyndyqtan ótkizip qoımaı, zamanaýı salalarǵa (kıberqaýipsizdik, baılanys, logıstıka, medısına) beıimdep, oqytý kerek dep sanaıdy.
"Áskerden keıingi áleýmettik qoldaý tetigi, jumysqa ornalasýǵa kómektesý, jeńildetilgen turǵyn úı baǵdarlamalaryna qatysý múmkindigin keńeıtý de mańyzdy", - dedi ol.
