Almatynyń ortalyǵynda salynyp jatqan 40 qabatty turǵyn úi kesheni qoǵamda qyzý talqylanyp jatyr. Májilis depýtaty Sergei Ponomariov bul qurylysqa qarsylyq bildirip, jobany qalanyń tynysyn taryltatyn sheshim dep atady,- dep habarlaidy Dalanews.kz.
Áńgime Seifýllin dańǵyly men Timiriazev kóshesiniń qiylysynda turǵyzylǵaly jatqan RAMS kompaniiasynyń jańa turǵyn úi kesheni jaiynda. Joba boiynsha bul aýmaqta 40 qabatty bir munara men 10 qabatty taǵy bes ǵimarat boi kótermek.
Depýtattyń pikirinshe, qurylys qala infraqurylymyna orasan zor aýyrtpalyq túsiredi. Sebebi bul aýdan onsyz da kólik keptelisine jii ushyrap, áleýmettik nysandardyń tapshylyǵynan zardap shegip otyr.
"Mundai qurylystyń, árine, qalaǵa túsirer salyq túrinde paidasy bar, jumys oryndary ashylady. Biraq dál osy jerde osyndai úlken keshen turǵyzýdyń qajeti qansha? Bul aimaqta onsyz da mektep, aýrýhana jetpei jatyr. Halyqqa demalys orny, saiabaqtar, áleýmettik nysandar kerek. Onyń ornyna qalanyń kólik infraqurylymyna, elektr jáne káriz júielerine qosymsha aýyrtpalyq túsiretin taǵy bir alyp keshen turǵyzylmaq", – deidi depýtat.
Ponomariovtyń aitýynsha, mundai qurylys qaladaǵy azǵantai toptyń ǵana múddesin kózdeidi, al qarapaiym turǵyndar úshin tek qiyndyq ákeledi.
Sondai-aq, depýtat osyǵan deiin RAMS kompaniiasynyń basqa jobasynda áleýmettik nysandar – mektep pen aýrýhana turǵyzýǵa ýáde bergenin eske saldy. Biraq ýáde etilgen nysandar áli kúnge deiin salynbaǵan, tek turǵyn úiler ǵana tapsyrylǵan.
Qazir RAMS-tyń bul jańa jobasy memlekettik saraptamadan ótip jatyr. Depýtat Sergei Ponomariov jobany qaita qaraý kerektigin aityp, qalalyq bilik ókilderiniń aldyna naqty suraqtar qoiatynyn jetkizdi.
