Búgin mánerlep syrǵanaýdan Qazaqstannyń bes dúrkin chempıony, Olımpıada-2014 qola júldesiniń ıegeri, álem chempıonatynyń úsh dúrkin chempıony Denıs Tenniń ajal qushqanyna 6 jyl boldy, dep habarlaıdy Dalanews.kz.
2018 jyldyń 19 shildesinde tapa tal túste Almatynyń qaq ortasynda sportshyny urylar pyshaqtap ketti. Muz aıdynyn baǵyndyrǵan 25 jastaǵy sportshy alǵan jaraqatynan aýrýhanada qaıtys boldy.
Qaıǵyly oqıǵadan keıin qylmystyq is qozǵalyp, Nuraly Qıasov pen Arman Qudaıbergenov 18 jylǵa sottaldy. Olar jazasyn qaýipsizdigi joǵary mekemede óteýge jiberildi.
Qylmys jasalǵanyn habarlamaǵany úshin Janar Tolybaeva 4 jylǵa bas bostandyǵynan aıyryldy. Ol 2022 jyly jazasyn tolyq ótep, bostandyqqa shyqty.
2024 jyly sottalǵan Nuraly Qıasov pen Arman Qudaıbergenovtiń jazasy jeńildetilgeni belgili boldy. Bul aqparatty Almaty oblysy sotynyń baspasóz qyzmeti rastady.
Resmı aqparatqa sáıkes, Almaty oblysyndaǵy №12 mekemeniń bastyǵy Qıasov pen Qudaıbergenovke 2023 jyldyń 17 naýryzyndaǵy qylmystyq sot isin júrgizýge qatysty engen ózgeristi qoldanýdy usynǵan.
2023 jyldyń 19 qazanynda №12 mekeme bastyǵynyń usynysy qanaǵattandyryldy. Bul sheshimge olardyń buǵan deıin sottalmaǵany jáne qasaqana qylmys jasaǵany úshin 2 jyldan astam ýaqytqa bas bostandyǵynan aıyrylǵany áser etken. Sottalǵandardyń jaǵdaıyn jaqsartatyn zańnamanyń ózgerýine sáıkes, olar qaýipsizdigi ortasha qylmystyq-atqarý júıesiniń mekemesinde jazasyn óteıdi.
