بۇگىن مانەرلەپ سىرعاناۋدان قازاقستاننىڭ بەس دۇركىن چەمپيونى، وليمپيادا-2014 قولا جۇلدەسىنىڭ يەگەرى، الەم چەمپيوناتىنىڭ ءۇش دۇركىن چەمپيونى دەنيس تەننىڭ اجال قۇشقانىنا 6 جىل بولدى، دەپ حابارلايدى Dalanews.kz.
2018 جىلدىڭ 19 شىلدەسىندە تاپا تال تۇستە الماتىنىڭ قاق ورتاسىندا سپورتشىنى ۇرىلار پىشاقتاپ كەتتى. مۇز ايدىنىن باعىندىرعان 25 جاستاعى سپورتشى العان جاراقاتىنان اۋرۋحانادا قايتىس بولدى.
قايعىلى وقيعادان كەيىن قىلمىستىق ءىس قوزعالىپ، نۇرالى قياسوۆ پەن ارمان قۇدايبەرگەنوۆ 18 جىلعا سوتتالدى. ولار جازاسىن قاۋىپسىزدىگى جوعارى مەكەمەدە وتەۋگە جىبەرىلدى.
قىلمىس جاسالعانىن حابارلاماعانى ءۇشىن جانار تولىبايەۆا 4 جىلعا باس بوستاندىعىنان ايىرىلدى. ول 2022 جىلى جازاسىن تولىق وتەپ، بوستاندىققا شىقتى.
2024 جىلى سوتتالعان نۇرالى قياسوۆ پەن ارمان قۇدايبەرگەنوۆتىڭ جازاسى جەڭىلدەتىلگەنى بەلگىلى بولدى. بۇل اقپاراتتى الماتى وبلىسى سوتىنىڭ باسپا ءسوز قىزمەتى راستادى.
رەسمي اقپاراتقا سايكەس، الماتى وبلىسىنداعى №12 مەكەمەنىڭ باستىعى قياسوۆ پەن قۇدايبەرگەنوۆكە 2023 جىلدىڭ 17 ناۋرىزىنداعى قىلمىستىق سوت ءىسىن جۇرگىزۋگە قاتىستى ەنگەن وزگەرىستى قولدانۋدى ۇسىنعان.
2023 جىلدىڭ 19 قازانىندا №12 مەكەمە باستىعىنىڭ ۇسىنىسى قاناعاتتاندىرىلدى. بۇل شەشىمگە ولاردىڭ بۇعان دەيىن سوتتالماعانى جانە قاساقانا قىلمىس جاساعانى ءۇشىن 2 جىلدان استام ۋاقىتقا باس بوستاندىعىنان ايىرىلعانى اسەر ەتكەن. سوتتالعانداردىڭ جاعدايىن جاقسارتاتىن زاڭنامانىڭ وزگەرۋىنە سايكەس، ولار قاۋىپسىزدىگى ورتاشا قىلمىستىق-اتقارۋ جۇيەسىنىڭ مەكەمەسىندە جازاسىن وتەيدى.
