Demokratiialyq innovatsiialar: Qazaqstanda Prezident sailaýy ótedi
Qymbatty otandastar!
Biylǵy jyl jan-jaqty reformalar men naqty ózgerister jylyna ainaldy.
Maýsym aiynda ótken referendýmnyń nátijesinde bilik tarmaqtary arasynda tiimdi tepe-teńdik ornady.
Memleket «kúshti Prezident – yqpaldy Parlament – esep beretin Úkimet» qaǵidasyn berik ustanady.
Májilis pen máslihattar jańa aralas júie boiynsha jasaqtalady.
Depýtattardyń bir bóligi partiialyq tizimmen, qalǵany bir mandatty okrýgten sailanady.
Konstitýtsiialyq sot qurylyp, aldaǵy qańtar aiynan jumys istei bastaidy.
Adam quqyqtary jónindegi ýákil institýty konstitýtsiialyq mártebege ie boldy.
Biliktiń birqatar ókilettigi qaita bólinip, keibir quzyretter Prezidentten Parlamentke berildi.
Endi óńirlerdiń ákimderi balamaly jolmen tańdalady.
Konstitýtsiiaǵa jer jáne onyń qoinaýy halyqqa tiesili degen bap engizildi.
Men osy erejeni júzege asyrý úshin «Ulttyq qor – balalarǵa» degen múlde jańa baǵdarlama usyndym.
Konstitýtsiialyq reforma – men Memleket basshysy bolyp sailanǵannan beri júzege asyryp jatqan aýqymdy saiasi jańǵyrý baǵdarlamasynyń ajyramas bóligi.
Osy baǵdarlama aiasynda beibit jinalystardy ótkizý úshin aldyn-ala eskertý tártibi engizildi.
Saiasi partiialardy tirkeý rásimi jeńildetilip, tirkeýdiń qajetti shegi tómendetildi.
Sailaý aldyndaǵy partiialyq tizimdi jasaqtaý jáne depýtat mandattaryn bólý kezinde áielder men jastar úshin 30 paiyzdyq kvota engizildi.
Saiasi partiialardyń Májiliske ótý shegi 7-den 5 paiyzǵa tómendedi.
Sailaý biýlletenderine «bárine qarsymyn» degen baǵan qosyldy.
Parlamenttik oppozitsiia institýty quryldy.
Qylmystyq kodekstiń 130-baby qylmystyq dep tanylmaityn boldy, 174-baby izgilendirildi. Ólim jazasy joiyldy.
Aýyl ákimderin tikelei sailaý tásilderi engizildi. Sondai-aq basqa da kóptegen tyń bastamalar júzege asyryldy.
Jalpy, sońǵy úsh jylda jasalǵan ózgerister men konstitýtsiialyq reforma memlekettik-saiasi qurylymnyń jańa úlgisin qalyptastyrdy.
Sondyqtan men Joldaýymda sailaý merzimin jariia túrde jáne ashyq aittym.
Osylaisha, biz basty memlekettik institýttar – Prezident, Parlament, Úkimet jáne máslihattardyń bárin birtindep qaita quramyz.
Osy bastamalar jariialanǵannan beri bir aiǵa jýyq ýaqyt ótti.
Bul – barlyq máseleni baiyppen talqylap, jaǵdaidy baǵamdaýǵa jetkilikti merzim.
Halyq bizdiń saiasi júieni ózgertý týraly josparymyzdyń mán-mańyzyn jaqsy túsinip otyr.
Sondyqtan men búgin buǵan deiin aitylǵan sailaýdyń merzimine jáne Ata zańnyń talaptaryna sáikes,
Osy naýqan eldiń búkil saiasi júiesin túbegeili ózgertetin sailaý kezeńin bastap beredi.
Sol arqyly ekonomikany turaqty damytýdy, halyqtyń ál-aýqatyn arttyryp, turmys sapasyn jaqsartýdy kózdeitin uzaq merzimdi mindetterdi júzege asyrýǵa múmkindik týady.
Men Joldaýymda birqatar aýqymdy áleýmettik-ekonomikalyq sharalar qolǵa alynatynyn jariialadym.
Biz onyń bárin jaqyn arada júzege asyrýymyz kerek.
Kóp uzamai qoǵamǵa sailaý aldyndaǵy tuǵyrnamamdy usynamyn.
Onda áleýmettik-ekonomikalyq damýdy kózdeitin jańa bastamalar aitylady.
Men Memleket basshysy retinde sailaý naýqany qatań túrde zańǵa sáikes ótetinine kepildik beremin.
Ony otandyq jáne sheteldik baiqaýshylardyń qatysýymen ádil ári ashyq ótkizetin bolamyz.
Barsha azamattarymyzdy jaýapkershiligin sezinip, demokratiia, zań jáne tártip qaǵidattaryn berik ustanýǵa shaqyramyn.
Elimizdiń birligi men tutastyǵyn kórsete bileiik.
Halqymyzdyń taǵdyry, Qazaqstannyń bolashaǵy árqaisymyzdyń qolymyzda.
Biz Ádiletti Qazaqstandy birge quramyz!
