Tsianid qospasy arqyly altyn óndirýdi Qazaqstanda oilap tapqan joq, bul tehnologiia ótken ǵasyrdyń ortasynan beri álemniń kóptegen elinde qoldanylyp keledi. Bul týraly búgin Óskemende ótken tabiǵat bailyǵyn paidalaný máselesine qatysty kezdesýde ekolog Dáýlet Asanov aityp berdi.
Keiingi kezde qoǵamda, ásirese áleýmettik jelide Maraldydaǵy altyn óndirý fabrikasynda qoldanylatyn tsianid qospasynyń ziiany týraly qaýeset kóp aitylyp júr. Jýrnalistermen bolǵan kezdesýde ekolog bul himiialyq qospaǵa qatysty alyp-qashpa áńgimeniń núktesin qoidy.
Onyń aitýynsha, Maraldy aýyly mańyndaǵy salynyp jatqan altyn óndirý fabrikasynda qoldanylatyn tsianid qospasy qorshaǵan ortaǵa eshqandai ziian tigizbeidi.
– Tsianitti paidalanýdyń arnaiy tehnologiiasy bar. Ony eshkim ashyq túrde qoldanbaidy. Maraldydaǵy altyn óndirý fabrikasynda tsianit jabyq tsehta sý, belsendirilgen kómir jáne basqa da zattarmen aralastyrylyp qospa retinde daiyndalady, sodan keiin ǵana ony jabyq qubyr arqyly kenge quiady.
Al kenniń ózi eni 4 metr bolatyn dambymen qorshalǵan jabyq aýmaqta saqtalady jáne ol 250 myń tonna mólsherinde. Jabyq jerde saqtalǵan kenniń astynda jerasty sýlaryn lastanýdan saqtaityn arnaiy ekran bolady. Bul ekran 30 sm qalyńdyqtaǵy betomata taqtalardan turady. Onyń ústinde arnaiy geomembrana tóseledi. Jobalyq sheshimde onyń qalyńdyǵy 0,8 mm bolýy kerek dep kórsetilse, Maraldydaǵy kásiporynda adamdar men qorshaǵan ortanyń qaýipsizdigin arttyrý úshin ony 1,5 mm-ge deiin qalyńdatqan.
Iaǵni, qorǵanysh qabaty eki esege deiin qalyńdady. Sodan keiin eń joǵarǵy qabatyna topyraq jaiylady. Topyraqtyń betinde ken jatady. Iaǵni, kenge quiylǵan tsianit qospasy birneshe qabattan ótip bolǵansha quramyna altyndy jinaidy da, eń túbine jetkende keri qarai tsehqa jabyq qubyrmen jóneltiledi.
Osylaisha sý kózderi men qorshaǵan ortany lastanýdan qorǵaý úshin fabrikada tuiyq sheńberli óndirý ádisi júzege asyrylady. Aitalyq, fabrika men siltisizdendirý alańynyń ortasynda óndiristik sý ainalmaly júiede júredi. Búkil óndiris tsehtyń ishinde, jabyq túrdegi arnaiy qurylǵylardyń ishinde júredi. Sondyqtan tsianidtiń ózenge nemese jerasty sýlaryna qosylýy múmkin emes, – deidi Dáýlet Asanov.
Sonymen qatar ekolog fabrikada suiyq qaldyqtar bolmaitynyn atap ótti. Al eger alda-jalda tótenshe jaǵdai bola qalsa qoldanylǵan tsinaid qospasy arnaiy shuńqyrǵa aǵyzylady, ol jerde de tehnologiialyq qaýipsizdik qatań saqtalǵan.
Esterińizge sala keteiik, áleýmettik jelilerde ShQO-daǵy jer qoinaýyn paidalanýshylar men adamdar arasynda daý-damai týyndap, sońy tártip buzýshylyqqa deiin barǵan. Máseleniń mán-jaiyn anyqtap, shynaiy aqparat alý úshin jergilikti BAQ ókilderi arnaiy kezdesý uiymdastyrý jóninde bastama kótergen. «Altainews» media-ortalyǵynyń uiymdastyrýymen memlekettik organdar, sarapshylar men jýrnalister arasynda ashyq dialog boldy.
