Dariǵa Nazarbaevaǵa tiesili bolǵan astanadaǵy "Dýman" qonaqúii memleketke qaitarylyp,aýktsion arqyly satýǵa qoiyldy, - dep habarlaidy Dalanews.kz.
Bir qyzyǵy Nazarbaeva qonaqúidi 4,3 milliard teńgege satyp alǵan. Al aýktsionda ǵimarattyń starttyq baǵasy - 41 milliard teńge.
Shishkin_like telegram arnasynyń málimetinshe, qonaqúi satylatyny týraly aqparat memlekettik múlikti satýǵa arnalǵan elektron saýda alańynda paida bolǵan. 18 qabattyq ǵimarat sol jaǵalaýda ornalasqan. Ishinde jalpy 211 bólme, 2 prezidenttik liýks bólme, bassein, fitnes klýb, batýt parki, boýling ortalyǵy bar.
Aýktsion 21 tamyzda bastalady. Satyp alamyn degen adam aldymen 110 million teńge kepildik jarna tóleýi kerek.
Dariǵa Nazarbaeva qonaqúidi DLS Group Kazakhstan kompaniiasy arqyly basqaryp otyrǵan. Eks-prezidenttiń qyzy qonaqúide 2007-2017 jyldar aralyǵynda quryltaishy bolǵan.
DLS Group Kazakhstan 10 jyl boiy, 2024 jyldyń sáýirine deiin "Armaniia" JShS quryltaishysy bolǵan. "Armaniia" - qonaqúidi basqaryp otyrǵan kompaniia.
Qazirgi tańda Dariǵa Nazarbaeva "Armaniianyń" quryltaishylar qatarynda joq. Ǵimarat "Qaitarylǵan aktivterdi basqarý kompaniiasy" JShS-ne tiesili. Bul kompaniia prezidenttiń "Zańsyz iemdelingen aktivterdi qaitarý týraly" zańy negizinde qurylǵan.
