Almaty ákimi Darhan Satybaldy jol tóseminiń shógýi men jiektastyń negizsiz aýystyrylýyna bailanysty Áýezov pen Medeý aýdandarynyń ákimderine qatań sógis jariialady, dep habarlaidy Dalanews.kz.
Almatyda Bostandyq aýdany ákiminiń orynbasary merdiger jumysyna tiisti baqylaý júrgizbegeni úshin qyzmetinen bosatyldy.
Almaty ákimi qaladaǵy jol tóseminiń jýyrdaǵy shógýi men jekelegen ýchaskelerde jiektastyń negizsiz aýystyrylýy máselesin baqylaýda ustap otyr. Darhan Satybaldy Áýezov aýdanyndaǵy Amanjol jáne Iassaýi kóshelerindegi asfalttyń shógýi, Ermensai shaǵynaýdanynda transheialardyń shaiylýy, sondai-aq Bostandyq aýdanyndaǵy Úlken Almaty ózeniniń jaǵalaýynan granit plitalardyń urlanýy derekteri boiynsha qyzmettik tergeý júrgizýdi tapsyrdy.
Jekelegen aýmaqtarda merdiger uiymdardyń jumysyn tiisinshe baqylamaý saldarynan oryn alǵan jaǵdaiǵa bailanysty: nóser kezinde Amanjol kóshesinde jol tósemi shógip (sýmen jabdyqtaý jáne káriz jelilerin tartý boiynsha qurylys-montaj jumystaryn «Spetsstroi Grýpp LTD» JShS oryndaǵan), 13 avtokólik zaqymdaldy. Sondai-aq Iassaýi kóshesinde asfalt opyrylǵan (uzyndyǵy 2,8 km bolatyn káriz jelisin «Spetskommýnstroi» merdiger uiymy salǵan). Osyǵan bailanysty Áýezov aýdany ákimine qatań sógis jariialandy.
Budan bólek, Ermensai shaǵynaýdanynda injenerlik kommýnikatsiialar tartý úshin qazylǵan transheialardy qatty sý aǵyny shaiyp, avtokólikterdiń qozǵalysyna kedergi keltirgen ýchaskede («SGGroup Sapa Stroi» JShS jumysy), sondai-aq ál-Farabi dańǵyly men Jarokov kóshesindegi jerasty ótkelinde granit plitalardy negizsiz aýystyrý jumystaryna baqylaýdyń bolmaýyna bailanysty Bostandyq aýdany ákiminiń bolmaýyna orai onyń turǵyn úi-kommýnaldyq sharýashylyǵy jáne abattandyrý salasyna jetekshilik etetin orynbasary qyzmetinen bosatyldy.
Merdiger uiymdy baqylaýda kemshilik jibergeni úshin – Medeý aýdany ákimine de qatań sógis jariialandy. Ýálihanov býlvaryndaǵy jiektasty zańsyz sheship alyp, plitalardy oblystaǵy jeke úige jetkizý oqiǵasy qoǵamda úlken narazylyq týǵyzdy. Atalǵan derek boiynsha qylmystyq is qozǵaldy.
Sonymen qatar, qala basshysy Úlken Almaty ózeniniń arnasyn qaita jańǵyrtý jáne irgeles aýmaqty abattandyrý jobasyn oryndap jatqan «Pavlodar ózen porty» AQ merdiger uiymynyń jumysyndaǵy kemshilikterge qyzmettik tekseris júrgizýdi jáne onyń sebebin anyqtaýdy tapsyrdy. Osyǵan bailanysty jobanyń tapsyrys berýshisi – Ekologiia basqarmasynyń basshysyna sógis jariialandy. Ákim sondai-aq Politsiia departamenti bastyǵyna Úlken Almaty jaǵalaýynan granit plitalardyń urlanýyna qatysty qylmystyq is tergeýiniń nátijeleri boiynsha esep berýdi tapsyrdy.
Budan bólek, Darhan Satybaldy qysqa merzimde jobalardaǵy anyqtalǵan kemshilikterdi joiýdy tapsyrdy. Sondai-aq GASK-qa merdiger uiymdardyń jáne tehnikalyq qadaǵalaý qyzmetiniń jumysyn qaita tekserý mindetteldi. Eger bul merdiger uiymdardyń jumystaryn adal oryndamaǵany rastalsa, qatań shara qoldanyp, aiyppul salynatyn bolady.
