Májilis depýtaty Elnur Beisenbaev búginde aqshaǵa kelgende ardy attap ketetinder, bailyqqa buqarany aldap jetetinder az emes ekenin aitty, dep habarlaidy Dalanews.kz.
Depýtattyń sózinshe, oiynnan oiyn shyǵaryp, ony jelige júktep, halyqty taqyrǵa otyrǵyzýdy tabystyń kózi qylǵandardy aýyzdyqtaý úshin "Oiyn biznesi, lotereia jáne lotereia qyzmeti máseleleri týraly" zań jobasy jazylǵan.
"2024 jyly zańsyz lotereia uiymdastyrǵan 101 adamǵa 41 mln teńge aiyppul salyndy. Ońai aqshaǵa qunyqqandardyń kózin aqshanyń sheli basqany sonsha - ózgelerdiń ot basqanyn kórse de zańsyz lotoreia uiymdastyrýdy qoiar emes. 2025 jyldyń basynan bastap búgingi kúnge deiin taǵy 79 adam ákimshilik jaýapkershilikke tartylyp, olarǵa 33,1 mln teńge aiyppul salyndy", - dedi ol.
Depýtat birneshe blogerdi atap kórsetti.
"Birinshiden, keibir áleýmettik jeliniń múmkindigin belsendi paidalanatyn infliýenser-alaiaqtar ýaqytsha kompaniialar quryp, paidasyz videokýrstar daiyndap, sony satý degen syltaýmen zańsyz lotereia uiymdastyryp jatyr. Qarapaiym azamattardy bul zańsyz is-áreketterge kóptep tartý úshin syilyq retinde páter, avtokólik, elektronika men smartfondar, tipti záýlim kottedjder tigip jatyr.
Mysaly, oqyrmandar sany 3 million bolatyn Darhan Jolshybekov "darhanzholshybekov" akkýanty arqyly 300 million teńge turatyn záýlim úiine zańsyz utys uiymdastyryp, shamamen 1,5 mlrd teńge qarjy jinaǵan. Al oqyrmandary sany 6,9 milliondy quraityn "supermamasita" akkaýnty arqyly Baitýǵaeva Áliia birneshe ret baǵaly syilyqtardy oinatyp, derekter boiynsha 500 million teńge qarajat jinaǵan.
Jalpy oqyrmandary 13 million bolatyn "Justking31" jáne "AminaXO" Instagram akkaýnttarynyń ieleri Nurtaza Nýrbek jáne Amina záýlim úilerin zańsyz lotereia uiymdastyrý arqyly satyp, 1,5 mlrd teńge somasynda qarjy jinaǵan", - dedi ol.
Aita keteiik, bloger Erbolat Janabylovtyń basy osyndai daýǵa qaldy, ol sotta buǵan deiin kinásin moiyndamady.
