Shtab otyrysynda Týberkýlez problemalary ulttyq ortalyǵynyń dırektory T.Ábildaev, QR İİM Qylmystyq-atqarý júıesi komıteti tóraǵasynyń orynbasary A.Bazylbekov, sondaı-aq densaýlyq saqtaý basqarmalarynyń jetekshileri baıandama jasady.
Salıdat Qaıyrbekova Qazaqstan ǵalamdyq básekege qabilettilik ındeksinde ustanymyn jaqsartqanymen, týberkýlezdiń dárige tózimdi túrimen syrqattanýshylyq kóleminiń artýy, sondaı-aq, qylmystyq-atqarý júıesi mekemelerindegi týberkýlezge shaldyqqan naýqastarǵa kórsetiletin kómek jaıy mamandardy alańdatyp otyrǵanyn alǵa tartty.
Oǵan qosa, jıynǵa qatysýshylar jergilikti atqarýshy organ ókilderiniń nazaryn – jyldam dıagnostıkalaý qondyrǵylarymen jabdyqtaý, naýqastardy áleýmettik qoldaý, týberkýlezge qarsy birqatar uıymdardyń materıaldyq-tehnıkalyq bazasyn ınfeksıalyq baqylaý talaptaryna sáıkestendirý sıaqty týberkýlezge qarsy is-sharalar kóleminiń jetkiliksiz bolyp otyrǵanyna aýdardy.
Respýblıkalyq shtab sheńberinde QR DSÁD (Densaýlyq saqtaý jáne áleýmettik damý)
birinshi vıse-mınıstri Medısınalyq qyzmetti baqylaý komıtetine penıtensıarlyq júıeniń týberkýlezge qarsy mekemelerine tekserý júrgizýdi tapsyrdy. Týberkýlezdiń sozylmaly túrlerimen aýyratyn naýqastardy tıisti emdeý máseleleri respýblıkalyq shtabtyń kelesi otyrysynda tyńdalatyn bolady.
QR Densaýlyq saqtaý jáne áleýmettik damý
mınıstrliginiń baspasóz qyzmeti
