Qazaqstan quramasynyń kapıtany fınalda ózbek Shahram Ǵıasovty 3:0 (29:28, 29:28, 29:28) esebimen jeńdi. Alǵashqy eki raýndta Danıar qasha urys salyp júrip, qajet upaılardy jaqsy jınap aldy. Sońǵy kezeńde Ǵıasov baryn saldy, alaıda upaı aıyrmasyn sál qysqartqany bolmasa, altynǵa laıyq eńbek sińire alǵan joq habarlaıdy statsport.kz saıty.
«Qazaqtyń altyn salmaǵy» atanyp ketken 69 kelide Danıar Eleýsinov qatarynan tórtinshi ret altyn medal jeńip alǵan boksshy bolyp otyr. 2004 jyly Afınada — Baqtıar Artaev, 2008 jyly Beıjińde — Baqyt Sársekbaev, 2012 jyly Londonda Serik Sápıev osy salmaqta olımpıada chempıony ataǵyn ıelendi. Salmaq dárejeleri ózgermeı turǵan kezde, 2000 jyly Sıdneıde Ermahan Ybyraıymov 71 kelide top jardy. Demek, qatarynan 5 olımpıadada qazaq jigitteri orta salmaqtyń darabozy atanyp keledi.
Danıar Eleýsinov Olımp bıigine barar jolda Serik Sápıevtiń soqpaǵymen júrdi desek te bolady. Serik alǵashqy olımpıadasynda (Beıjińde) 64 kelide synǵa túsip, shırek fınalda súrindi, taı Manýs Býnjamnońnan utyldy. Danıar bolsa, áýeli Londonda 64 keli salmaqta shırek fınaldan asa almaı, ıtalıalyq D.Manjıakaprege ese jiberdi. Serik London olımpıadasyna 69 kelide baq synady, Qazaqstan quramasynyń kapıtany boldy. Danıar da bıyl Brazılıaǵa kapıtan retinde attanyp, 69 kelide top jardy. Olımp bıigine shyǵardan bir jyl buryn, 2011 jyly Sápıev álem chempıonatynyń kúmis júldesin ıelendi. Al Eleýsinov ótken jyly Dohadaǵy álemdik dodanyń fınalynda Muhammed Rabııge (Marokko) ese jiberip, vıse-chempıon atandy. Mine, chempıondarymyzdyń ómir jolyndaǵy uqsastyq osyndaı.
Danıar Eleýsinov qazaq boksshylarynyń Atlantadan bergi jeńis jolyn jalǵady. Ol — Jırov, Sattarhanov, Ybyraıymov, Artaev, Sársekbaev, Sápıevterden keıin chempıon atanǵan jetinshi bylǵary qolǵap sheberi. Bıyl ol Qazaqstan quramasynyń qorjynyna N.Rahımov (aýyr atletıka), D.Balandınnen (júzý) keıin úshinshi altyndy saldy.
