– Dál qazir túrli alypqashpa áńgimelerge boi aldyrmańyzdar. Sý tasqynan zardap shekken úilerdiń eshqaisy tekserýshilerdiń nazarynan tys qalmaidy. Tabiǵat apatynan zardap shekken úilerdiń bári tekserýden ótkennen keiin kúrdeli jóndeý jumystary úshin tiisti qarjy bólinetin bolady. Úileri jóndeýge kelmei qalǵan otbasylarǵa jańadan baspana satyp alyp beremiz. Qazirgi tańda apattyń zardabyn baǵalaityn komissiia jumys istep jatyr. Sý tasqynan ózge de dúnie-múlikterińiz zardap shekse, onyń birden komissiia múshelerine aityńyzdar. Onyń bári esepke alynýy kerek. Alǵashqy kezekte úi jylytýǵa qajetti kómir men aǵash jáne azyq-túlik pen jyly kiimder beriletin bolady. Qalanyń tótenshe jaǵdai qyzmetiniń qorynda qajetti zattardyń bári bar. Dúisenbi kúni qosymsha 70 mln. teńge bóletin bolamyz, – dedi Danial Ahmetov.
Sonymen qatar sý tasqyna kezinde jergilikti máslihat depýtattarynyń da qol qýsyryp qarap otyrmaýy kerek ekenin alǵa tartty.
«Máslihat depýtattary sý tasqynynan zardap shekkenderdiń arasynda bolyp, memleket tarapynan qandai kómek kórsetiletinin aityp, turǵyndardy sabyrǵa shaqyrýy kerek»,
– dedi oblys ákimi.
Qazirgi tańda qalada memlekettik organdardyń jyljymaldy pýnkteri jumys istep jatyr. Olar halyqtyń aryz-shaǵymyn qabyldap, kópshilik arasynda túsindirý jumystaryn júrgizýde. Sý basqan aýmaqtan kóshirilgen qala turǵyndary qaladaǵy úsh qonaq úige ýaqytsha ornalastyrylǵan.
Aldyn ala málimetter boiynsha Semei qalasynda 300 úidi sý basqany málim boldy. Qazirgi tańda Ertis ózenindegi qalyń muzdy jarý jáne jaǵalaýdy bekitý jumystary qatar júrip jatyr.
– Semei qalasyndaǵy Ertis ózeniniń jaǵalaýyn biiktetý jumystary 20 jyl buryn qolǵa alynýy kerek edi. Ókinishe orai, bul jumystar túrli qiyndyqtarǵa bailanysty qolǵa alynbady. Bizge qalany sýdan qorǵaityn biik bógen kerek. Qazirgi tańda bul joba daiyndalý ústinde. Aldaǵy jazda bul jumystardyń bárin aiaqtaityn bolamyz, – dedi Danial Ahmetov.
