Qonaq úilerge ornalastyryldy degen turǵyndardyń jaǵdaiy máz emes bolyp shyqty. Sebebi, bir bólmege birneshe otbasy kirgizilgen eken. Baqytgúl Ertaeva osyndaǵy Kraevaia, 55 mekenjaiyndaǵy úide turady eken. Otbasyndaǵy alty adammen qonaqúidiń bir bólmesinde turyp jatyr.
– Meniń aiaǵym aýyr bolǵandyqtan da otbasyma bir kishirek bólme berdi, – dep muńyn shaqty Baqytgúl Ertaeva oblys ákimi Danial Kenjetaiulyna, – menen basqa halyqqa da janym ashidy. Eki ne úsh januia bir bólmede ornalasqan. Bizge bergen bir bólmede bir ǵana kereýet tur. Balalardy jerge jatqyzaiyn desem, eden sýyq. Kórpe-jastyq jetpeidi. Úidegi dúnieniń bári malmandai sý bolyp ketti. Úiden tósenish ákelmek bylai tursyn, kire almai qaldyq. Osyǵan kómektesińizshi qurmetti Danial Kenjetaiuly, sizden óte qatty ótinemin.
– Men jańa sizder siiaqty úilerine sý kirip, eriksiz qonaqúilerge aýysqan Mirnyi aýylynyń turǵyndarymen betpe-bet sóilestim, jaǵdailaryn suradym, – dedi oblys ákimi Danial Ahmetov, – Barlyǵyńyzdy da sabyr saqtaýǵa shaqyramyn. Mine, qala ákimi Ermak Sálimovke tapsyryp turmyn, ákim orynbasarlary qonaqúilerdegi halyqtyń jaǵdaiyn jasaý úshin táýlik boiy kezekshilik jasaityn bolady. Eger sizderdi qonaqúide durys qabyldamasa, tipti úsh kún boiy tasyǵan sýdyń astynda qaldyryp, odan, búgin mine, úilerińizdiń ishi belýarǵa deiin muz bop qatyp qalsa, sizderden keshirim ótinemin. Tez ýaqytta osy kemshilikti joiamyz. Túsindińizder me?
Oblys ákimi Kraevaia kóshesiniń taǵy bir turǵyny Gúlfiia Marattyń úiine de baryp, aralap shyqty. Kóptegen úiler endi sý emes, muzdyń astynda qalyp otyr. Gúlfiia apa óziniń jaǵdaiyn aityp, kómek surady.
– Semeide shyǵyn óteý úshin arnaiy komissiia quryldy, – de jaýap berdi oblys basshysy Gúlfiia apaǵa, – olar sizderdiń úidiń ishin kórip, qanshalyqty búlindi, ne isteý kerek, sonyń barlyǵyn esepke alady da, shyǵyndy óteidi. Kimniń úii shynymen sý tasqynnan zardap shekti, olardy biz nazardan tys qaldyrmaimyz.
Raýshan Nuǵmanbekova
Derekkózi: kaz.altaynews.kz
