Alakól jaǵasynda jumys toby júrgizgen jumys barysynda osy jáne ózge zań buzýshylyq Qazaqstan Respýblıkasynyń Zańnamasyna sáıkes anyqtaldy. Demalys úılerin tolyq tekserý jumysy aımaq basshysy Danıal Ahmetovtyń bastamasymen júrgizildi. Tıisti jaýapty quzyrly organdar tekserý jumystaryn júrgizip, zań buzýshylyqty anyqtady. Alakól kólinde júrgizilgen keshendi saraptama jumystary Shyǵys Qazaqstannyń marjany – Alakólde joǵary deńgeıde demalys uıymdastyrýǵa biraz ýaqyt qajet etetindikti kórsetti.
Sonymen, jumys toby Alakól jaǵasynda 147 demalys bazasy men úıler bar ekenin anyqtap, onyń 80 nysanynda qajet qujattardyń joqtyǵy anyqtaldy. Arhıtektýra, qurylys jáne qala qurylysy boıynsha 44 eskertý berildi.
Jalpy, jumys toby 160-tan astam nysandy tekserdi, onyń ishinde dúkender, kafeler men saýda núkteleri bar. Abattandyrý jumystary tórt nysanda ǵana júrgizilgen. Birqatar nysandarda sanıtarlyq qaýipsizdik boıynsha zań buzýshylyq bar ekeni anyqtaldy.
Ot qaýipsizdigi sharalary boıynsha jaǵdaı tipti máz emes. Alakól jaǵasyndaǵy nysandardyń basym bóligi aǵashtan turǵyzylǵany eshkimge jasyryn emes. Sondyqtan olar otqa óte qaýipti. 140 nysanda ot qaýipsizdigin saqtaý sharalaryn buzý faktileri anyqtaldy. Sonymen qatar avtokólik úshin keıbir kóshelerde tipti jol da joq.
– Birde-bir nysan demalýshylarǵa tolyq jaǵdaı jasaı almaıtyn bolsa, óz qyzmetin jalǵastyra almaıdy. Barlyq eskertýlerdi kelesi demalys maýsymyna deıin joıý maqsatynda kásipkerlermen memorandým jasasý qajet. Barlyq eskertýlerdi joıǵanda ǵana óz qyzmetin kól jaǵasynda jalǵastyra alady, – dedi aımaq basshysy Danıal Ahmetov. Memorandým bir aıdyń ishinde jasalý qajet.
Sonymen qatar oblys ákimi bir aıdyń ishinde Alakól jaǵasyn damytý josparyn daıyndaýdy tapsyrdy. Onda jol qurylysy, turǵyn úı-kommýnaldyq ınfraqurylym qurylysy zańǵa sáıkes jáne qaýipsizdik sharalaryn saqtaý negizinde júzege asyrylý qajet.
"QmD" aqparat
