Osydan 2 kún buryn kishi Aiagóz ózeni arnasynan on ese asyp, nátijesinde aýdan ortalyǵyndaǵy úsh shaǵyn kópirdi qiratyp, 148 úi sý astynda qalǵan edi. Aýdanda tabiǵi apatqa bailanysty tótenshe jaǵdai jariialanyp, zardap shekken úilerdiń turǵyndary dereý qaýipsiz jerge kóshirilgen bolatyn. Qazirgi tańda olar arnaiy mekemelerge ornalastyrylyp, ystyq tamaq jáne tósek-orynmen tolyq qamtamasyz etilgen.
Aita ketý kerek, sýda qalǵan 148 úidiń búginde 8-i qulaǵan. 10 úi apatty jaǵdaida tur. Alaida ShQO ákimi bul san aldaǵy kúnderi eselenýi yqtimal, sondyqtan sońǵy kórsetkish emes deidi. Qyzyl sýdyń ótinde qalǵan ár úidi ózi aralap shyqqan Danial Ahmetovke turǵyndar aryz-shaǵymdaryn barynsha jetkizdi. Máselen, qirap qalǵan úilerdiń ishinde Jeltoqsan kóshesi, 72 meken-jaiynda ornalasqan Ilmira Qaiymbaevanyń baspanasy bar. Kishkentaiyna aiaǵy aýyr otanasy «qabyrǵasy sógilip, irgesi qiraǵan shańyraǵymdy kim qalpyna keltirip beredi?» degen saýalyn qoidy Danial Ahmetovke. Oblys ákimine dál osy sipatta joldanǵan jalǵyz suraq bolmady bul. Óz kezeginde ondaǵan aiagózdiktiń qabyrǵasyn qaiystyrǵan, qala berdi kúlli Qazaqstan halqyn tolǵandyrǵan máselege ShQO ákimi bylai dep núktesin qoidy.
– Birde-bir Aiagózdiń turǵyny nazardan tys qalmaidy. Baspanasy jaramsyz qalǵan otbasylaryna osy qaladan úi satyp alyp beremiz. Qazirgi tańda Aiagózde 15 úi satylady degen aqparat berdi maǵan. Solardyń bárin satyp alamyz. Odan keiin ortalyqta 60 páterli jańa úi boi kóterip jatyr. Sol jerden páter beremiz. Eshkim baspanasyz qalmaidy.
Oblys ákimi málim etken resmi jaýapqa rizashylyǵyn bildirgen turǵyndar kóz jastaryn jasyra almady.
– Úi beremiz dep ýáde berdi. Alla buiyrsa aldaǵy tańda baspanaly bolamyz. Mamyrda balam dúniege keledi. Danial Ahmetovke zor alǵys bildiremin. Bárine rahmetimdi aitamyn. Kelip, kórip, jaǵdaiymyzdy surap jatyr. Qýanyshtan jylap turmyn, – deidi Ilmira Qaiymbaeva.
ShQO ákimi Danial Ahmetov sondai-aq, erteń Aiagózge oblystyq «Paryz» qorynan 50 million teńge joldanatynyn jetkizdi. Atalǵan qarajat kún tártibinde turǵan ózekti máselelerdi, atap aitqanda kómir, azyq-túlik, kiim-keshek siiaqty turmystyq jaǵdaidy sheshýge jumsalady.
Apat saldaryn esepteýge qurylǵan arnaiy komissiia jumysyn jalǵastyrýda. Búginde ózen deńgeii birshama tómendegen. Jergilikti bilik kópirlerdi qalpyna keltirý jumystaryn atqarýda. Al qalada qurylǵan eriktiler qyzyl sý shaiyp ótken aýmaqtardy tazalaý jumysyn júrgizýde.
Budan bólek Danial Ahmetov Úrjar, Kúrshim, Jarma siiaqty joǵary qaýip tóngen aýdandar aýmaǵyndaǵy jaǵdaidyń jiti nazarǵa alynǵanyn, arnaiy tikushaqpen baqylaý bastalǵanyn aitty.
ShQO ákiminiń baspasóz qyzmeti
https://dalanews.kz/34669
