وسىدان 2 كۇن بۇرىن كىشى اياگوز وزەنى ارناسىنان ون ەسە اسىپ، ناتيجەسىندە اۋدان ورتالىعىنداعى ءۇش شاعىن كوپىردى قيراتىپ، 148 ءۇي سۋ استىندا قالعان ەدى. اۋداندا تابيعي اپاتقا بايلانىستى توتەنشە جاعداي جاريالانىپ، زارداپ شەككەن ۇيلەردىڭ تۇرعىندارى دەرەۋ ءقاۋىپسىز جەرگە كوشىرىلگەن بولاتىن. قازىرگى تاڭدا ولار ارنايى مەكەمەلەرگە ورنالاستىرىلىپ، ىستىق تاماق جانە توسەك-ورىنمەن تولىق قامتاماسىز ەتىلگەن.
ايتا كەتۋ كەرەك، سۋدا قالعان 148 ءۇيدىڭ بۇگىندە 8ء-ى قۇلاعان. 10 ءۇي اپاتتى جاعدايدا تۇر. الايدا شقو اكىمى بۇل سان الداعى كۇندەرى ەسەلەنۋى ىقتيمال، سوندىقتان سوڭعى كورسەتكىش ەمەس دەيدى. قىزىل سۋدىڭ وتىندە قالعان ءار ءۇيدى ءوزى ارالاپ شىققان دانيال احمەتوۆكە تۇرعىندار ارىز-شاعىمدارىن بارىنشا جەتكىزدى. ماسەلەن، قيراپ قالعان ۇيلەردىڭ ىشىندە جەلتوقسان كوشەسى، 72 مەكەن-جايىندا ورنالاسقان يلميرا قايىمبايەۆانىڭ باسپاناسى بار. كىشكەنتايىنا اياعى اۋىر وتاناسى «قابىرعاسى سوگىلىپ، ىرگەسى قيراعان شاڭىراعىمدى كىم قالپىنا كەلتىرىپ بەرەدى؟» دەگەن ساۋالىن قويدى دانيال احمەتوۆكە. وبلىس اكىمىنە ءدال وسى سيپاتتا جولدانعان جالعىز سۇراق بولمادى بۇل. ءوز كەزەگىندە ونداعان اياگوزدىكتىڭ قابىرعاسىن قايىستىرعان، قالا بەردى كۇللى قازاقستان حالقىن تولعاندىرعان ماسەلەگە شقو اكىمى بىلاي دەپ نۇكتەسىن قويدى.
– بىردە-بىر اياگوزدىڭ تۇرعىنى نازاردان تىس قالمايدى. باسپاناسى جارامسىز قالعان وتباسىلارىنا وسى قالادان ءۇي ساتىپ الىپ بەرەمىز. قازىرگى تاڭدا اياگوزدە 15 ءۇي ساتىلادى دەگەن اقپارات بەردى ماعان. سولاردىڭ ءبارىن ساتىپ الامىز. ودان كەيىن ورتالىقتا 60 پاتەرلى جاڭا ءۇي بوي كوتەرىپ جاتىر. سول جەردەن پاتەر بەرەمىز. ەشكىم باسپاناسىز قالمايدى.
وبلىس اكىمى ءمالىم ەتكەن رەسمي جاۋاپقا ريزاشىلىعىن بىلدىرگەن تۇرعىندار كوز جاستارىن جاسىرا المادى.
– ءۇي بەرەمىز دەپ ۋادە بەردى. اللا بۇيىرسا الداعى تاڭدا باسپانالى بولامىز. مامىردا بالام دۇنيەگە كەلەدى. دانيال احمەتوۆكە زور العىس بىلدىرەمىن. بارىنە راحمەتىمدى ايتامىن. كەلىپ، كورىپ، جاعدايىمىزدى سۇراپ جاتىر. قۋانىشتان جىلاپ تۇرمىن، – دەيدى يلميرا قايىمبايەۆا.
شقو اكىمى دانيال احمەتوۆ سونداي-اق، ەرتەڭ اياگوزگە وبلىستىق «پارىز» قورىنان 50 ميلليون تەڭگە جولداناتىنىن جەتكىزدى. اتالعان قاراجات كۇن تارتىبىندە تۇرعان وزەكتى ماسەلەلەردى، اتاپ ايتقاندا كومىر، ازىق-تۇلىك، كيىم-كەشەك سياقتى تۇرمىستىق جاعدايدى شەشۋگە جۇمسالادى.
اپات سالدارىن ەسەپتەۋگە قۇرىلعان ارنايى كوميسسيا جۇمىسىن جالعاستىرۋدا. بۇگىندە وزەن دەڭگەيى ءبىرشاما تومەندەگەن. جەرگىلىكتى بيلىك كوپىرلەردى قالپىنا كەلتىرۋ جۇمىستارىن اتقارۋدا. ال قالادا قۇرىلعان ەرىكتىلەر قىزىل سۋ شايىپ وتكەن اۋماقتاردى تازالاۋ جۇمىسىن جۇرگىزۋدە.
بۇدان بولەك دانيال احمەتوۆ ءۇرجار، كۇرشىم، جارما سياقتى جوعارى ءقاۋىپ تونگەن اۋداندار اۋماعىنداعى جاعدايدىڭ ءجىتى نازارعا الىنعانىن، ارنايى تىكۇشاقپەن باقىلاۋ باستالعانىن ايتتى.
شقو اكىمىنىڭ باسپا ءسوز قىزمەتى
https://dalanews.kz/34669
