Damý úlgimizdi ózgertetin kez keldi me?
Pikir-saiys klýbynyń jetekshisi Edýard Poletaev óz sózinde Qazaqstannyń Eýropalyq odaqpen aradaǵy áriptestik kelisimshartqa qol qoiýiyna baǵa berdi. «Bul bizdiń diplomatiia úshin úlken jetistik. Qosymsha eýropalyq investitsiialardy tarta alamyz. Bul kelisim Eýraziialyq odaqtyń printsipine de qaishy kelmeidi» dedi.
Professor Bolat Sultanov odaqqa múshe memleketterdiń arasyndaǵy saýda ainalymyna toqtaldy. «Odaqqa múshe memleketterdiń arasyndaǵy taýar ainalymy biylǵy jyly tómendep ketti. 2015 jyldyń qańtary men qazany aralyǵynda Qazaqstannyń odaq elderimen aradaǵy eki jaqty saýda ainalymy 13 mlrd dollardy quraǵan eken. Negizinde, bul kórsetkish 23-24 mlrd dollardy quraýy tiis edi. Paiyzǵa shaqsaq, Odaqqa múshe memleketterdiń arasyndaǵy taýar ainalymy 40 paiyzǵa tómendegen» dedi ol.
Al Áskeri-strategiialyq zertteýler ortalyǵynyń bas ǵylymi qyzmetkeri Andrei Hannyń pikirinshe Eýraziialyq odaqtyń qurylýy sátsiz kezeńge sai keldi. «Taǵy bir jait – Resei túrik qyzanaqtaryn tasymaldaýǵa tyiym salǵanda, Qazaqstan: «Endi kókónis ónimderin tasýdy bizge tapsyryńyzdar» degen. Biraq, Resei buǵan kóngen joq. Olar ózderiniń kókónis óndirisin damytyp, osy arqyly importty aýystyrýdy kózdeýde. Saiyp kelgende ózge memleketterdiń Reseiden kútken úmiti aqtalǵan joq» dedi Han óz sózinde.
Al jiyndy túiindegen QR Prezidenti janyndaǵy Strategiialyq zertteýler ortalyǵynyń bas ǵylymi qyzmetkeri Lesia Karataeva: «Negizinde Reseidiń eksporttyq potentsialy tómendegen joq. Al Qazaqstannyń áleýeti azaiyp ketti. Osyǵan tań qalamyn. Bizge eshqandai sanktsiia salynǵan joq. Sonda Qazaqstannyń eksporttyq áleýetiniń tómendeýine ne sebep boldy? Munyń birden-bir sebebi – shikizat. Bizdiń eksporttyń eń negizgi bóligi – shikizat. Bizdiń ekonomika osyǵan beiimdelgen. Qiyn shaqta osy másele bizdiń aiaǵymyzdan shaldy. Ekonomikalyq damý modelimizdi ózgertpesek áli de shala beredi» dedi.
