"Damý" qory qorshaǵan ortany qorǵaýǵa kóńil bóledi
Mundai sheshim «Damý» Qory Direktorlar keńesiniń ashyq otyrysynda qabyldandy.
Eýropa investitsiialyq bankiniń nesie jelisi «Damý» Qoryna aktsioneri - «Báiterek» Ulttyq basqarýshy holdinginiń kepildigimen bólinedi. Shaǵyn jáne orta kásipkerlikke degen qarajat ulttyq valiýtamen ekinshi deńgeili bankter arqyly beriledi. Bul – bankter men kásipkerlerdiń valiýtalyq táýekelge bas tikpeýlerine qolaily.
EIB qarajaty klimat ózgerýinen bolatyn zardaptardy azaitý, elektr qýatyn únemdeý, energotiimdilikti arttyrý sekildi qorshaǵan ortany qorǵaýdy maqsat etken kóptegen «jasyl» jobalarǵa baǵyttalǵan.
«Búginde bizdiń el «jasyl» ekonomikaǵa ótý úshin belsendi túrde investitsiia tartyp jatyr. «Damý» Qory direktorlar keńesiniń 200 mln eýro bólý týraly osy jolǵy sheshimi shaǵyn jáne orta kásipkerlikte qýat kózderin únemdeý men energotiimdilikke baǵyttalǵan jańa jobalar ashylýyna túrtki bolyp, bul sala men jalpy ekonomika úshin strategiialyq investitsiialar tartýǵa sep bolady. Eýropa investitsiialyq banki ekonomikanyń barlyq salalarynda ekologiialyq, ekonomikalyq jáne tehnikalyq bai tájiribesi bar, ári negizgi reitingtik agenttikterdiń barlyǵynan «AAA» reitingine ie bolǵan bank. Aldaǵy eki aidyń ishinde bul jobalar boiynsha kásipkerlerdiń nesie alý sharttary daiyndalady. Sonymen qatar, ekinshi deńgeili bankter de ShOB jobalarymen ainalysatyn qosyn qurady. Qarajat naqty jobalarǵa birneshe transhpen beriledi»,-dedi «Damý» Qory Basqarma tóraǵasy Qanysh Tleýshin.
Aldyn-ala esep boiynsha, osy baǵdarlama boiynsha berilgen nesieler 103,4 mlrd teńgeni quraidy. Shamamen, «jasyl» jobasy bar 500 kásipker qarajat ala alady. Olar 1 myń jańa jumys oryndaryn ashyp, 87,5 mlrd teńge salyq tóleidi dep boljanyp otyr.
