Pavlodar qalasyndaǵy №5 mekteptiń mańynda “Dala Qyrandary” respýblikalyq jastar uiymynyń Pavlodar bólimshesi Semei, Qaraǵandy, Qosshy, Temirtaý jáne Astana qalalarynan kelgen qyrandarmen birlesken reid ótkizdi. Bul bastama — aimaqtyq bólimsheniń jumysyna qoldaý kórsetý ári pavlodarlyq kyrandarǵa seriktestik kómek berý maqsatynda uiymdastyrylǵan, dep habarlaidy Dalanews.kz.
Qyrkúiek aiynda №5 mektep mańynda ótken reid barysynda "Dala Qyrandary" oqý ornynyń janynda esirtki satý men qoldaný derekterin anyqtady.Sondyqtan 5 qazan kúni komanda qaitadan sol jerge baryp, aýmaqty tazalap shyqty. Sonymen qatar bul áreket arqyly olar balalar men jasóspirimderdiń qaýipsizdigine tikelei áser etetin máselege bilik pen qoǵamnyń nazaryn aýdartýdy maqsat etti.
Is-sharanyń basty maqsaty — #satqyndarǵa qarsy kúres. Bul bastama Prezidenttiń "Zań jáne tártip" tujyrymdamasyna sai júzege asýda. Búginde sintetikalyq esirtkiler – jastarǵa tóngen eń qaýipti qaterlerdiń biri. Olardy taratýshylar, iaǵni satqyndar, óz paidasy úshin jastardyń densaýlyǵyn, sanasyn jáne bolashaǵyn qurtyp keledi. 2024 jyldyń qyrkúieginen beri óskeleń urpaqqa qaýipsiz ári salaýatty orta qalyptastyrýmen ainalysyp kele jatqan uiym úshin esirtki qaterine qarsy turý – bir rettik shara emes.
Reidten keiin qatysýshylar qylmystyq is-áreket izderin joidy — zańsyz ainalymǵa qatysy bar zattardyń barlyǵyn órtep jiberdi. Aktsiia birlik pen jaýapkershilik rýhynda ótti. Qazaqstannyń alty qalasynan kelgen uiym músheleri men aýdan turǵyndary óz kóshelerin qaýipsiz etý maqsatynda kúsh biriktirdi.
“Dala Qyrandary” uiymynyń Pavlodar qalalyq bólimshesi Lermontov kóshesin óz baqylaýyna alyp, munda esirtki saýdasymen jáne ony tutynýmen bailanysty adamdardyń bolmaýyna turaqty túrde baqylaý júrgizedi”, — “Dala Qyrandary” Pavlodar bólimshesiniń jetekshisi Elaman Erǵantai málimdedi.
“Dala Qyrandary” uiymynyń úilestirýshisi Erasyl Sailaýovtyń aitýynsha, uiym músheleriniń ustanymy aiqyn.
“Sintetikalyq esirtkiden azat Qazaqstan — bul deni saý ulttyń, berik qoǵamnyń jáne qaýipsiz bolashaqtyń kepili. Tek memleket pen qoǵamnyń, jastardyń birlesken is-qimyly ǵana #satqyndardyń jolyn kesip, el erteńin saqtap qala alady”, — deidi ol.
Aktsiia qorytyndysyn “Dala Qyrandary” jastar qoǵamdyq birlestiginiń úilestirýshisi Nurǵali Tursynǵaziev shyǵardy.
“Bul aktsiia — “Dala Qyrandary” respýblikalyq birlestiginiń esirtki qaýpine qarsy kúrestegi kezekti qadamy ǵana. Qyrandar aldaǵy ýaqytta da reidter ótkizip, jastardy tartýdy jáne óz qalasy men kóshesine jaýapkershilikpen qaraý mádenietin qalyptastyrýdy jalǵastyrady. Óitkeni #satqyndar-ǵa qarsy turý – eldiń erteńine beijai qaramaityn árbir jastyń paryzy”, - dedi ol.
