D. Abaev: «Analogtyq taratylymdy toqtaý – bailanysty damytyp, shyǵyndardy qysqartady»
Ministrdiń aitýynsha, tsifrlyq efirlik teletaralymdy qoldanysqa engizý jáne damytý – sapaly tsifrlyq otandyq telearnalardyń halyqqa qoljetimdiligin qamtamasyz etý – áleýmettik turǵydan mańyzdy joba.
– Analogtyq efirlik taratylymnyń kezeń-kezeńmen óshirilýi mobildi bailanystyń damýyna, analogtyq jelimen qyzmet kórsetý shyǵyndaryn azaitýǵa, halyqaralyq mindettemelerdi oryndaýǵa jáne aýdandyq teleradio habarlaryn taratýdyn órkendeýine sebep bolmaq, – dedi D. Abaev.
Búgingi kúni analogtyq jáne jer betindegi tsifrlyq taratylym jelileri qatar jumys isteýde. Analogtyq taratylym jelisimen memlekettik telearnalardyń habar taratýy úshin jyl saiyn jumsalatyn memlekettik shyǵyndar shamamen 1,2 mlrd teńgeni quraidy.
Sondai-aq, is-sharalardyń iske asyrý merzimderin uzartý uialy bailanystyń tórtinshi býyny 4G-di engizýge kedergi týǵyzady.
Sonymen qatar, jiyn barysynda ulttyq teleradio habarlaryn taratý jelisin «Intelsat-904» sheteldik spýtniginen otandyq KA «KazSat-3» spýtnigine aýystyrý máselesi talqylandy.
– Jelini sheteldik spýtnikten otandyq spýtnikke aýystyrý tehnikalyq turǵydan da, saiasi turǵydan da qajet. Osyǵan bailanysty «OTAU TV»-niń barlyq abonentterin qazaqstandyq «Qazsat-3» spýtnigine kóshirýge kúsh salýymyz kerek, – dedi ministr.
Ministrdiń aitýynsha, aýystyrýǵa qatysty barlyq tehnikalyq is-sharalar osy jyldyń qyrkúiek aiaǵyna deiin aiaqtalýy qajet.
Jiyn sońynda BAQ arqyly halyqqa aqparattyq nasihat júrgizýdi kúsheitý týraly tapsyrma berildi. «Qazteleradio» AQ-na «OTAU TV» abonentteriniń «Qazsat-3» spýtnigine tolyqtai kóshirilýi jáne jergilikti organdarmen birlese otyryp, ataýly áleýmettik kómek alatyn januialarǵa tsifrlyq efirlik taratylym qyzmetterin qosý máselesin ázirleý tapsyryldy.
«QmD» aqparat
