COVID-19. PTR men KT ótý múmkindigi bolmasa, qan taldaýyn tapsyrǵan abzal
– Maǵan basqa adamdardyń keńesimen antibiotikterdiń 2 túrinen 2 kýrs ishken adam habarlasty. Bul baýyrǵa salmaq túsiredi jáne antibiotikorezistenttilikti qalyptastyrady. Mundai ádis emdemeidi, – dedi Almaty qalasynyń shtattan tys bas pýlmonology Sáýle Qasenova. Bul týraly ol Ortalyq kommýnikatsiialar qyzmeti alańynda ótken brifingte málimdedi.
Onyń aitýynsha, antibiotikter virýstarǵa áser etpeidi. Bul preparattar bakteriialardyń kóbeiýin basady. Al virýstyq COVID-19 kezinde antibiotikterdi kómegi tier degen jeleýmen taǵaiyndaýǵa bolmaidy.
KVI juqtyrǵandardyń aitýynsha, aýrýdyń alǵashqy belgileri tamaqtyń aýrýy, murynnyń bitelýi bolǵan. Al 2-3 kúnnen keiin dene qyzýy kóterilgen.
– Bul joǵary tynys alý joldarynyń zaqymdanýynyń belgileri. Eger osy kezde PTR alynatyn bolsa, ol asa sezimtal bolǵandyqtan virýsty anyqtaýy múmkin. Men dáriger retinde testtiń jalǵan-teris nátije kórsetýin bylai túsindiretin edim. Alǵashqy kúnderi virýs joǵarǵy tynys joldarynda (muryn-jutqynshaq) kóbeiedi, sodan keiin tómen túsedi. Kompiýterlik tomografiia ókpeniń zaqymdaný kólemin anyqtaý úshin aiqyn klinikalyq simptomdar bolǵanda ǵana jasalady. Eger PTR-test nemese KT ótý múmkindigi bolmasa, onda jalpy qan taldaýyn tapsyrýǵa bolady. S-reaktivti aqýyz, D – dimer siiaqty virýstyq infektsiianyń markerleri dárigerge naýqasty qalai emdeý kerek ekendigi týraly biraz aqparat beredi, – dep túsindirdi pýlmonolog.
