– ماعان باسقا ادامداردىڭ كەڭەسىمەن انتيبيوتيكتەردىڭ 2 تۇرىنەن 2 كۋرس ىشكەن ادام حابارلاستى. بۇل باۋىرعا سالماق تۇسىرەدى جانە انتيبيوتيكورەزيستەنتتىلىكتى قالىپتاستىرادى. مۇنداي ءادىس ەمدەمەيدى، – دەدى الماتى قالاسىنىڭ شتاتتان تىس باس پۋلمونولوگى ساۋلە قاسەنوۆا. بۇل تۋرالى ول ورتالىق كوممۋنيكاسيالار قىزمەتى الاڭىندا وتكەن بريفينگتە مالىمدەدى.
ونىڭ ايتۋىنشا، انتيبيوتيكتەر ۆيرۋستارعا اسەر ەتپەيدى. بۇل پرەپاراتتار باكتەريالاردىڭ كوبەيۋىن باسادى. ال ۆيرۋستىق COVID-19 كەزىندە انتيبيوتيكتەردى كومەگى تيەر دەگەن جەلەۋمەن تاعايىنداۋعا بولمايدى.
كۆي جۇقتىرعانداردىڭ ايتۋىنشا، اۋرۋدىڭ العاشقى بەلگىلەرى تاماقتىڭ اۋرۋى، مۇرىننىڭ بىتەلۋى بولعان. ال 2-3 كۇننەن كەيىن دەنە قىزۋى كوتەرىلگەن.
– بۇل جوعارى تىنىس الۋ جولدارىنىڭ زاقىمدانۋىنىڭ بەلگىلەرى. ەگەر وسى كەزدە پتر الىناتىن بولسا، ول اسا سەزىمتال بولعاندىقتان ۆيرۋستى انىقتاۋى مۇمكىن. مەن دارىگەر رەتىندە تەستتىڭ جالعان-تەرىس ناتيجە كورسەتۋىن بىلاي تۇسىندىرەتىن ەدىم. العاشقى كۇندەرى ۆيرۋس جوعارعى تىنىس جولدارىندا (مۇرىن-جۇتقىنشاق) كوبەيەدى، سودان كەيىن تومەن تۇسەدى. كومپيۋتەرلىك توموگرافيا وكپەنىڭ زاقىمدانۋ كولەمىن انىقتاۋ ءۇشىن ايقىن كلينيكالىق سيمپتومدار بولعاندا عانا جاسالادى. ەگەر پتر-تەست نەمەسە كت ءوتۋ مۇمكىندىگى بولماسا، وندا جالپى قان تالداۋىن تاپسىرۋعا بولادى. س-رەاكتيۆتى اقۋىز، D – ديمەر سياقتى ۆيرۋستىق ينفەكسيانىڭ ماركەرلەرى دارىگەرگە ناۋقاستى قالاي ەمدەۋ كەرەك ەكەندىگى تۋرالى ءبىراز اقپارات بەرەدى، – دەپ ءتۇسىندىردى پۋلمونولوگ.
