– Men bergen tapsyrma boiynsha ekinshi jarty jyldyqta 150 milliard teńgeden astam qarjy bólingen. Alaida ústemaqy men saqtandyrý tólemderin alý kezinde áli kúnge deiin biýrokratiialyq tosqaýyldar bar, – dedi Toqaev.
Prezidenttiń aitýynsha, keibir jerlerde qyzmetkerler "sanmen oinap", ústemaqy úlestirý isin ashyq júrgizbegen. Keibir mekemelerde bas dárigerler meditsina qyzmetkerleriniń jumys ýaqytyn durys eseptemegen.
"Meditsina qyzmetkerleri ózine tiesili aqshany ótinip suramaýy tiis" dedi Toqaev.
30 qyrkúiek kúngi resmi málimet boiynsha, Qazaqstanda 182 meditsina qyzmetkeri koronavirýstan qaitys bolǵan. Toqaevtyń aitýynsha, tek 37 otbasyǵa ǵana ótemaqy tólengen.
"[Meditsina qyzmetkerleri] óliminiń sebebin anyqtaý túrli qiyndyq týǵyzady, keibiri etikamen de bailanysty. Osyǵan orai úkimetke qaitys bolǵan barlyq meditsina qyzmetkeriniń otbasyna ótemaqy tóleýdi tapsyramyn" dedi ol.
Prezident sonymen birge kásibi mindetin atqarý kezinde koronavirýs juqtyrǵan dárigerlerge de ótemaqyny keshiktirmei tóleýdi tapsyrǵan.
Zańǵa sáikes, elde koronavirýsty jumysta juqtyrǵany dáleldengen meditsina qyzmetkerleri ǵana ótemaqy ala alady. Ázirge qansha meditsina qyzmetkeriniń ótinishi qanaǵattandyrylmaǵany týraly málimet joq.
Al ótemaqy almaǵanyna shaǵymdanǵan meditsina qyzmetkerleri kóp. Buǵan deiin Nur-Sultanda 103 stantsiiasynda qyzmet etetin keibir feldsherler jumysta koronavirýs juqsa da, ótemaqy ótinishimiz qaralmai otyr dep shaǵymdanǵan edi.
Kóktem men jaz ailarynda ondaǵan meditsina qyzmetkeri "koronavirýs juqqan naýqastardy emdesek te ústemaqy almadyq" dep shaǵymdanǵan. Keibiri ústemaqynyń durys eseptelmegenin alǵa tartqan.
Resmi málimet boiynsha, 12 830 myń meditsina qyzmetkerine koronavirýs juqqan: 8 339 dárigerdiń virýsty jumysta juqtyrǵany anyqtalǵan.
Zań boiynsha, koronavirýs nemese koronavirýs pnevmoniiasyn juqtyrǵan meditsina qyzmetkerine – 2 mln teńge, koronavirýstan qaitys bolǵan meditsina qyzmetkeriniń otbasyna 10 mln teńge kóleminde ótemaqy beriledi.
