– مەن بەرگەن تاپسىرما بويىنشا ەكىنشى جارتى جىلدىقتا 150 ميلليارد تەڭگەدەن استام قارجى بولىنگەن. الايدا ۇستەماقى مەن ساقتاندىرۋ تولەمدەرىن الۋ كەزىندە ءالى كۇنگە دەيىن بيۋروكراتيالىق توسقاۋىلدار بار، – دەدى توقايەۆ.
پرەزيدەنتتىڭ ايتۋىنشا، كەيبىر جەرلەردە قىزمەتكەرلەر "سانمەن ويناپ"، ۇستەماقى ۇلەستىرۋ ءىسىن اشىق جۇرگىزبەگەن. كەيبىر مەكەمەلەردە باس دارىگەرلەر مەديسينا قىزمەتكەرلەرىنىڭ جۇمىس ۋاقىتىن دۇرىس ەسەپتەمەگەن.
"مەديسينا قىزمەتكەرلەرى وزىنە تيەسىلى اقشانى ءوتىنىپ سۇراماۋى ءتيىس" دەدى توقايەۆ.
30 قىركۇيەك كۇنگى رەسمي مالىمەت بويىنشا، قازاقستاندا 182 مەديسينا قىزمەتكەرى كوروناۆيرۋستان قايتىس بولعان. توقايەۆتىڭ ايتۋىنشا، تەك 37 وتباسىعا عانا وتەماقى تولەنگەن.
"[مەديسينا قىزمەتكەرلەرى] ءولىمىنىڭ سەبەبىن انىقتاۋ ءتۇرلى قيىندىق تۋعىزادى، كەيبىرى ەتيكامەن دە بايلانىستى. وسىعان وراي ۇكىمەتكە قايتىس بولعان بارلىق مەديسينا قىزمەتكەرىنىڭ وتباسىنا وتەماقى تولەۋدى تاپسىرامىن" دەدى ول.
پرەزيدەنت سونىمەن بىرگە كاسىبي مىندەتىن اتقارۋ كەزىندە كوروناۆيرۋس جۇقتىرعان دارىگەرلەرگە دە وتەماقىنى كەشىكتىرمەي تولەۋدى تاپسىرعان.
زاڭعا سايكەس، ەلدە كوروناۆيرۋستى جۇمىستا جۇقتىرعانى دالەلدەنگەن مەديسينا قىزمەتكەرلەرى عانا وتەماقى الا الادى. ازىرگە قانشا مەديسينا قىزمەتكەرىنىڭ ءوتىنىشى قاناعاتتاندىرىلماعانى تۋرالى مالىمەت جوق.
ال وتەماقى الماعانىنا شاعىمدانعان مەديسينا قىزمەتكەرلەرى كوپ. بۇعان دەيىن نۇر-سۇلتاندا 103 ستانسياسىندا قىزمەت ەتەتىن كەيبىر فەلدشەرلەر جۇمىستا كوروناۆيرۋس جۇقسا دا، وتەماقى ءوتىنىشىمىز قارالماي وتىر دەپ شاعىمدانعان ەدى.
كوكتەم مەن جاز ايلارىندا ونداعان مەديسينا قىزمەتكەرى "كوروناۆيرۋس جۇققان ناۋقاستاردى ەمدەسەك تە ۇستەماقى المادىق" دەپ شاعىمدانعان. كەيبىرى ۇستەماقىنىڭ دۇرىس ەسەپتەلمەگەنىن العا تارتقان.
رەسمي مالىمەت بويىنشا، 12 830 مىڭ مەديسينا قىزمەتكەرىنە كوروناۆيرۋس جۇققان: 8 339 دارىگەردىڭ ۆيرۋستى جۇمىستا جۇقتىرعانى انىقتالعان.
زاڭ بويىنشا، كوروناۆيرۋس نەمەسە كوروناۆيرۋس پنيەۆمونياسىن جۇقتىرعان مەديسينا قىزمەتكەرىنە – 2 ملن تەڭگە، كوروناۆيرۋستان قايتىس بولعان مەديسينا قىزمەتكەرىنىڭ وتباسىنا 10 ملن تەڭگە كولەمىندە وتەماقى بەرىلەدى.
