Astana sotynda Qýandyq Bishimbaevtyń isi boiynsha sot otyrysy jalǵasyp jatyr, - dep habarlaidy Dalanews.kz.
Qýandyq Bishimbaevtyń anasy sot otyrysyna onyń qoǵamdyq qorǵaýshysy retinde qatysyp jatyr. Ózin qorshap alǵan jýrnalisterdiń suraǵyna ol óte qysqa jaýap berdi.
"Bárin sot sheshedi", - dep qysqa qaiyrdy eks-ministrdiń anasy.
Al Astana qalasy boiynsha Sot ákimshiligi departamentiniń basshysy Eldos Jumaqsanov Qýandyq Bishimbaevtyń isi boiynsha ashyq protseske qatysqysy kelgenderdiń bári nege zalǵa kire almaǵanyn aitty.
"Sot zalyna kirgisi kelgender kirgizilmedi, bos oryndar boldy, biraq bireýge basymdyq berildi, bireýge berilmedi" dep jatyr.
Qylmystyq ister jónindegi aýdanaralyq sotta tek bes sot otyrysy zaly bar ekenine toqtalyp ótkim keledi. Bul rette osy sotta bir mezgilde tórt qylmystyq is qaralyp jatyr. Sottalýshy retinde bir-birden 32 adam, endi birinde 9 adam, taǵy birinde 8 adam ótip jatyr. Tórtinshisi - Bishimbaevtyń isi, onda eki adam - sottalýshy. Sáikesinshe munda segiz, toǵyz nemese 32 adam syimaidy. Sondyqtan osy zal tańdaldy", - dep túsindirdi Jumaqsanov.
Besinshi zal Bishimbaevtyń isin tikelei efirden kórgisi keletinderdiń barlyǵyna ashyq bolatyny aityldy.
Eldos Jumaqsanov taraptardyń biriniń ókilderine otyrys zalyna kirýge kóbirek múmkindik berilgeni týraly aqparatty da joqqa shyǵardy.
"Sottalýshy Bishimbaev zań boiynsha bir qoǵamdyq qorǵaýshyǵa quqyly. Ekinshi sottalýshynyń, iaǵni onyń týysynyń da qoǵamdyq qorǵaýshysy bar. Eki sottalýshynyń taǵy bes advokaty bar. Advokattar sany shekteýli emes. Tiisinshe qazirdiń ózinde jeti adam otyr, sonymen qatar, sot protsesinde sýdia bar. Jábirlenýshilerdiń bir qoǵamdyq qorǵaýshysy bar jáne, meniń oiymsha, tórt advokaty bar. Nátijesinde shamamen 14-15 adam. Sonymen qatar, aidaýyl qaǵidasynyń talaptaryna sáikes bir sottalýshyǵa keminde eki aidaýyl qajet. Tiisinshe eki sottalýshyda tórt aidaýyl. Bizde zaldyń syiymdylyǵy 19-20 adamǵa laiyqtalǵan, ol qatysýshylardyń sanymen shyǵady. Osylaisha, bireýinde kóp adam nemese bireýdiń týystary qatysyp otyr, bireýinde qatysyp otyrǵan joq degen aqparat shyndyqqa janaspaidy", - dedi ol.
Eske salaiyq, byltyr Qýandyq Bishimbaev áieli Saltanat Núkenovany óltirdi degen kúdikpen qamaýǵa alynǵan edi. Oqiǵa 2023 jyly 9 qarashada Astana qalasyndaǵy BAU meiramhanasynda boldy.
