Advokat Djohar Ótebekov Qýandyq Bishimbaevtyń anasy Almira Nurlybekova óziniń ústinen Qazaqstannyń advokattar alqasyna shaǵym túsirgenin málimdedi, dep habarlaidy Dalanews.kz.
«Bishimbaevtyń anasy meniń ústimnen aryz jazdy! Ol advokattarynyń suraqtaryna syn aitqanyma shaǵymdanǵan. Al shyn máninde olardy búkil el synap jatyr! Olar jaqsylyq pen zulymdyqtan asyp túsedi, zań men moraldan alshaq. Biraq Bishimbaevtar menen ǵana kiná taýypty. Bishimbaevtyń anasy meniń áleýmettik jelidegi jazbalaryma pikir jazýshylardy baqylamaitynymdy aitqan. Sodan keiin Bishimbaevtar meniń ústimnen jazǵan negizgi shaǵymǵa kósheiin: «Men sýdianyń áreketin synaǵan ekenmin»! Mine, bul - tuzdyǵy! Bishimbaevtar sýdia Qulbaevany nege sonsha qorǵap otyr? Olar oǵan nege sonsha jabysyp alǵan?», - dep jazady Djohar Ótebekov.
Advokat sot otyrysynda qorǵaýshynyń qaza tapqan Saltanattyń jábirlenýshi aǵasyna qandai suraqtar qoiǵanyn eske alady:
- Siz qaryndasyńyzdyń miynda tesik bar ekenin kórdińiz be jáne onyń kózi aǵyp ketken be?
- Er adamdarmen qarym-qatynasta Saltanat basym boldy ma?
- Siz nege Saltanattyń basynan teýip, judyryqpen urmadyńvz?
Bishimbaevtyń anasynyń jazýynsha, Ótebekov jariialaǵan jazbalarynda aiyptalýshynyń otbasyn, advokattaryn synǵa alǵan.
«Bul advokattyń jariialanymdary bizdiń advokattarymyzǵa, otbasymyzǵa óshpendilik, qarǵys jáne qorlaý týdyrady. Jazbanyń avtory bizdi qorlaityn pikirlerdi baqylamaidy. Sondai-aq ol sýdianyń áreketin synǵa alyp, ony meniń balamnyń qorǵaýshylaryna qarsy baǵyttaýǵa tyrysty, sottan janama túrde aiyptaýdy talap etti. (...) Osy advokatqa tártiptik shara qoldanýdy suraimyn», — dedi Almira Nurlybekova.
Aita keteiik, Bishimbaevtyń soty ashyq túrde ótip jatyr. Sot protsesin kóptegen adamdar kórip otyr. Qazaqstandyqtar áleýmettik jelilerde azappen qaza tapqan Saltanat Núkenovanyń otbasyn qoldaýǵa arnalǵan aktsiialar men fleshmobtar ótkizýde.
