Áleýmettik jelide Qýandyq Bishimbaevty aqtaýdyń jańa túri paida boldy. Bul joly olar marqum Saltanat Núkenovanyń aǵasy Aitbek Amangeldiniń esimin qaralaýǵa tyrysyp baǵyp otyr, - dep habarlaidy Dalanews.kz.
Daý Elena Semenova esimdi jeli qoldanýshysynyń jazbasynan keiin paida boldy.
"Keiingi kúnderi jalqaý adam ǵana Bishimbaevtyń advokattary men osy taqyrypty kótergen jýrnalisterdiń málimdemesine qatysty pikir bildirmegen shyǵar. Advokattar týraly aitpaǵan adam joq. Nelikten Saltanattyń qazasy kópshiliktiń narazylyǵyn týdyrdy? Saltanat degen kim? Nege bári ol týraly aityp jatyr? Al óz anasy aiaýsyz óltirip, anasynyń súiiktisi qoqysqa kómgen qorǵansyz bala she?
...Eń bastysy, nege marqumnyń aǵasy Aitbek Amangeldi, zorlyq-zombylyq kórgen áielderdi qorǵaityn adal adam ózi týraly bar shyndyqty aitpaidy?
Nelikten ol ózine qatysty aryz túskeni jaily shyndyqty aitpaidy? 10 jastaǵy qyzdy, iaǵni burynǵy ministr Bishimbaevtyń qyzyn zorlaý áreketi týraly raport baryn nege aitpaidy? Ol zorlaý týraly aryz berilgennen keiin tergeýden qalai qutyldy? Nelikten Aibek Amangeldiniń jaǵdaiynda sot tóreligi nátije bermedi, burynǵy ákim bolǵan aǵasynyń yqpaly boldy ma eken? Nelikten tergeý organdary birneshe saraptama júrgizbedi? Al Bishimbaevtyń burynǵy jubaiy úshin ne ózgerdi, ol aryz jazyp, sodan keiin eshteńe bolǵan joq dep aryzdy nege qaitaryp aldy? Qai kezden bastap bizde dálel emes pikir eskerildi? Nelikten qyzdyń anasy qaitys bolǵan adamdy altyn adam deidi? Bul, bir sózben aitqanda, aqsha úshin bárine kóz jumýǵa daiyn ekijúzdilik dep atalady!" - dep jazdy ol.
Máselege advokat Janna Muhamadi da ún qatty. Ol sol kúni shyn máninde ne bolǵanyn aitty.
"Satylatyn adamdarǵa daýa joq. Jańa shabýyl bastaldy, bul joly Saltanattyń aǵasynan pedofil jasap baǵýǵa tyrysyp jatyr.
Ol Bishimbaevtyń qyzyna shabýyl jasap, ony zorlamaq bolǵan deidi. Al oǵan jazadan qutylýǵa otbasy kómektesipti-mys. Nege bul jaǵdaida balanyń anasy men ákesi, ata-ájesi mán bermedi?
Bishimbaevtyń burynǵy áieli (balanyń anasy) ony jazasyz qaldyrar ma edi?
...Al búkil oqiǵa, shyn máninde, Saltanattyń aǵasy ony alyp ketýge kelgen kezde bolǵan. Ol (Saltanat - esk.) soqqyǵa jyǵylǵanyn bilgen boida Bishimbaevpen janjaldasty.
Balalar buǵan kýá boldy. Árine, qorqyp ketti. Politsiiaǵa Aitbek Amangeldiniń ózi qońyraý shaldy!!! Al bul oqiǵany Bishimbaevtyń ózi sheshti, óitkeni politsiia aralasqan jaǵdaida Saltanattyń soqqyǵa jyǵylǵany ashylyp qalar edi. Qylmystyq is marialdarynda munyń bári rastalady", - dep jazdy ol.
Bul jaitqa Aitbek Amangeldi de únsiz qalmady.
"Burynǵy áieli, qyzdyń anasy Nazymnyń pikiri. Meniń pikirim artyq bolatyn shyǵar", - dedi ol.
Máselege, rasynda da, Bishimbaevtyń burynǵy áieli Nazym Qaharman da aralasqan. Ol eks-sheneýnikpen 14 jyl bir shańyraq astynda birge turǵan, olardyń úsh balasy bar.
"Ýaý! Qandai nusqa. Jala jappaýdy suraimyn. Men sol qyzdyń anasymyn. Maǵan shaǵymym joq dep jazǵan jazbasha qujattardy kórsetińizder. Ózime de qyzyq bolyp ketti jáne maǵan zorlyq týraly jazbasha aryzdy kórsetińizder. ...Balalar qatty qorqyp ketken edi, al ákeleri olardy tún ishinde jalǵyz qaldyryp ketken. Munyń bárin Qýandyq jasady. Onyń ústine menen tipti politsiiaǵa qońyraý shalmaýymdy surady.
...Men, meniń qyzym týraly qolyńyzda aryzdar bolmasa da, sandyraq jazyp otyrsyz. Bizdi bilmei, oqiǵamyzdy bilmei. Bos sandyraq. Shynynda da tólenip qoiǵan", - dedi eks-ministrdiń birinshi áieli.
Aita keteiik, áielin uryp óltirdi degen kúdikke ilingen eks-ministr Qýandyq Bishimbaevty aqtaý protsesi qoǵamda qyzý talqylanyp jatyr.
Buǵan deiin jýrnalist Syrym Itqulov burynǵy ministr Ermuhamet Ertisbaevty Bishimbaevty qoldaýǵa qatysy bar adamdardyń biri ekenin aitqan edi.
"Qýandyqtyń ákesi Ýálihan Bishimbaevtyń ulyn qorǵashtap, qoǵamdaǵy pikirge áser etýge tyrysqan videosy esterińizde me? Ol jýrnalister men blogerlerdiń úsitnen ózin, ulyn, olardyń otbasyn kópshilik aldynda qorlaǵany úshin aryz jazdy.
Al buqaraǵa ún qatý úshin oǵan Nazarbaevtyń bulbuly - Ermuhamet Ertisbaevtan basqa eshkim múmkindik bergen joq.
Ýálihan Bishimbaev ta sol siiaqty, ómir boiy "eski qazaqstandyq". Ýniversitetti basqaratyn qatardaǵy rektor retinde esepsiz bailyq jinady. Olar qandai joldarmen "tabylǵany" túsinikti, sonyń arqasynda jubaiy uzaq jyl boiy tabysty biznesti basqardy.
Kópshilik Qýandyq Bishimbaevtyń ózi de sybailas jemqorlyq úshin otyrǵanyn umytyp ketti, biraq týystarynyń yqpaldy bailanystarynyń arqasynda ol merziminen buryn bostandyqqa shyqty", - dedi Itqulov.
Bala quqyqtary jónindegi ýákil Dinara Zákieva da osy is boiynsha dabyl qaǵyp, jýyrda sot otyrysy bastalatynyn jetkizdi.
