Áielin óltirdi dep aiyptalyp otyrǵan eks-ministr Qýandyq Bishimbaevqa qatysty sot otyrysy jalǵasyp jatyr. Otyrys barysynda memlekettik aiyptaýshy Saiahat Nurbekov Qýandyq Bishimbaevqa birneshe suraq qoidy, - dep habarlaidy Dalanews.kz.
Prokýror Nurbekov Bishimbaevtan sol kúngi oqiǵadan keiin taǵy da sýitsidke oqtalý áreketi bolyp-bolmaǵanyn surady.
"Tergeý izoliatorynda da mundai áreketter jasaýǵa tyrystym", - dedi Bishimbaev.
Artynsha memlekettik aiyptaýshy bes ai boiy beinebaqylaý kameralarynan mundai áreketti baiqamaǵanyn jetkizdi.
"Qurmetti sot, qurmetti alqabiler, Bishimbaev ustalǵan sátten bastap bes ai boiy jeke ózim protsessýaldyq prokýror retinde tergeý izoliatorynyń kamerasyna ornatylǵan beinebaqylaý kamerasyn qaradym. Soǵan nazar aýdarsańyzdar deimin. Osy bes ai ishinde birde-bir ret ózińizge ziian keltirýge tyryspadyńyz" - dedi prokýror Saiahat Nurbekov.
Buǵan deiin sotta qylmys bolǵan jerde jumys istegen qyzmetker kýáger retinde jaýap berip, sol kúni Bishimbaev pyshaq ustap júrgenin aitqan edi.
"Saǵat 19.00 shamasynda Baijanov telefonyma habarlasyp, BAU meiramhanasyna kóterilýimdi surady. Ne úshin ekenin bilmeimin. "Tez kóteril" dedi. Men birden sol jaqqa bardym. Liftke kirsem, jedel járdem boldy. Qýandyq Ýálihanuly qolyna pyshaq ustap júrdi. Ol dárethana jaqqa pyshaqpen kirip ketti. Biz qatty qorqyp kettik, artynan erdik. Odan pyshaqty alyp, politsiia kelgenshe kúttik. 15-20 minýtta politsiia keldi", - dedi barmen.
Onyń sózinshe, Bishimbaevty kórgen kezde qasynda tek Baijanov bolǵan.
"Bishimbaev eshteńe aitpady. Sasqalaqtap turdy. Jylap turdy. "Ne úshin istedim, ne boldy?" dedi. Keiin ólim bolǵanyn bildik. Qarsylaspady (pyshaqty alǵanda - esk.). Mas edi. Ol "men óltirdim be?" dep surady. Ol óz-ózine qol jumsaǵysy kelgen shyǵar (pyshaqty ustaýdaǵy maqsaty - esk.). Ol dárethanaǵa jalǵyz kirip, jaýyp aldy. Biz sýitsid jasai ma dep qorqyp kirdik. Pyshaqty alyp alǵan kezde ashanaǵa basqa pyshaq alý úshin júgirip ketti. Qan, eshteńe bolmady", - dedi barmen.
Al keiin Qýandyq Bishimbaev sot otyrysynda oqiǵa bolǵan kúni nege pyshaq ustap júrgenin túsindirgen bolatyn.
"...Men ol kóz jumǵanyn túsindim. Jedel járdem kelip, jansaqtaý sharalaryn istei bastady. Men eseńgirep qaldym. Keiin asúige baryp, pyshaq aldym. Bir ǵana oi boldy: óz-ózime qol jumsasam durys bolady dep oiladym. Keiin politsiia keldi. Mán-jai osylai boldy",- dedi Bishimbaev.
Aita keteiik, 27 naýryzda eks-ministr Qýandyq Bishimbaevtyń isi boiynsha alqabiler tańdalǵan edi. Alqabiler alqasyna 12 adam irikteldi: 10 – negizgi quram, 2 – qosalqy. Sodan keiin ashyq sot otyrystary bastaldy.
Sonymen qatar, Qýandyq Bishimbaev sotta Saltanat Núkenovany asa qatygezdikpen óltirgenin moiyndamady. Bul oqiǵa 2023 jyly 9 qarashada Astana qalasyndaǵy BAU meiramhanasynda boldy.
Keshegi sot otyrysynda Bishimbaev Saltanatty shashynan súirep, tepkilegen sumdyq kadrlar kórsetildi.
