Eks-mınıstr Qýandyq Bıshimbaev sot otyrysynda Saltanat Núkenovamen qalaı tanysqanyn aıtty, - dep habarlaıdy Dalanews.kz.
Onyń sózinshe, qoǵamda aıtylyp jatqan áńgimeler shyndyqqa janaspaıdy. Bıshimbaev sóılep bastaǵan kezde Saltanattyń anasy emosıasyn jasyra almady.
"Sizderdiń sezimderińizdi túsinemin. Sizder meni jek kórseńizder de, qarǵasańyzdar da bolady. Biraq taǵy da aıtaıyn, bir Qudaıdyń aldynda da jaýap berýge daıynmyn. Sizderdiń aldaryńyzda da, báriniń aldynda da. Qasaqana osyndaı is jasaıyn degen oı bolǵan joq. Saltanatty súıdim. Alaıda onyń ólimine qatysym bar ekenin moıyndaımyn.
...Bizdiń urys-kerisimiz, sol keshtegi meniń áreketterim bolmasa, eshteńe bolmas pa edi?! Osyǵan nazar aýdarsańyzdar eken. ...Meni 5 aı boıy "aıýan" dedi, "kózin oıyp aldy" dedi. Bári shyndyqqa janaspaıdy", - dedi Bıshimbaev.
Sonymen qatar, ol Núkenovamen qalaı tanysqanyn aıtty. Bıshimbaevtyń sózine súıensek, Núkenovany alǵashynda áleýmettik jeliden kórgen. Keıin kezdesip kórgisi kelgen.
"Men ony Instagram-nan kórdim. Oǵan astrologıalyq boljamǵa barǵan qyz astrologtar týraly aıtty. Maǵan astrologıa qyzyq boldy. Odan kórsetýin suradym. Tanysym Instagram-nan tanymal astrolog dep kórsetti. Ádemi qyz ekenin kórdim, Instgram-yn qarap shyqtym. Onyń jigiti bar ekenin de kórdim. 2022 jyly mamyrdyń aıaǵy edi. Tanysym jigiti bar ekenin, úılengeli jatqanyn aıtty. ...Biraz ýaqyt syrttaı ǵana baqyladym. Bir joly onyń qabyldaýyna jazylǵym keldi. Biraq kómekshisi onlaın túrde de, tirileı de er adamdardy qabyldamaıtynyn aıtty.
Tamyzdyń aıaǵynda sol qyz (tanysy - esk.) toı bolmaıtynyn, (Saltanat - esk.) turmysqa shyqqaly jatqan jigitimen aırylysqanyn jetkizdi. Tanysýǵa múmkindik bar ekenin túsindim. Kamıla degen qyzdan astrologıalyq boljamǵa jazylýyn ótindim. Al áńgime barysynda "dosym bar, onyń da kelgisi keledi" dep aıtýyn ótindim. Maǵan tanysý, bir jaǵynan astrologıa týraly bilý qyzyq boldy. Kamıla Saltanattyń qabyldaýyna barǵan. Olar dostasyp ketken. Bir-birine qyzdarǵa qatysty oqıǵalaryn aıta bastaǵan. Saltanat jigitimen aırylysqanyn da aıtqan. Meniń dos qyzym "osyndaı adam bar, seni Instagram-da kórgen, tanysqysy keledi" degen. Kamılamen telefonmen sóılesip jatqanda, "óziń sóılesip kórgiń kele me, janymda otyr" dedi. Men telefon arqyly tanysyp, amandastym. Saltanat "siz kelgen kezde astrologıalyq boljam ótkize alamyn" dedi. Keıin Qazaqstanǵa keldim.
Saltanat uzaq ýaqyt astrologıalyq boljamdy ótkizgisi kelmedi. Sodan soń oǵan ashyǵyn jazdym. "Shynyn aıtsam, boljam qyzyq emes, siz maǵan qatty unap qaldyńyz, tanysyp kórgim keledi, keshki asqa shaqyrsam" dedim. Ol 1-2 kún jaýap bermedi. Úshinshi kúni "kezdese alamyz" dedi. 6 qyrkúıek bolýy kerek, biz kezdestik", - dedi Bıshimbaev.
27 naýryzda eks-mınıstr Qýandyq Bıshimbaevtyń isi boıynsha alqabıler tańdalǵan edi. Alqabıler alqasyna 12 adam irikteldi: 10 – negizgi quram, 2 – qosalqy. Sodan keıin ashyq sot otyrystary bastaldy.
Keıin Qýandyq Bıshimbaev sotta Saltanat Núkenovany asa qatygezdikpen óltirgenin moıyndamady.
Bul oqıǵa 2023 jyly 9 qarashada Astana qalasyndaǵy BAU meıramhanasynda boldy.
