Áielin uryp óltirdi degen aiyp taǵylǵan Qýandyq Bishimbaevtyń isi boiynsha keshe aldyn ala tyńdaý ótti. Eks-ministr sot otyrysy barysynda tosyn málimdeme jasady. Tipti ol taǵylǵan aiypty moiyndamaitynyn da aitty.
Dalanews.kz zańger Tileýjan Kishkenebaevpen suhbattasyp, Bishimbaevtyń bul málimdemesi neni bildiretinin surady.
Eks-sheneýnik Bishimbaev keshe Astana sotynan alqa biler, BAQ ókilderiniń qatysýymen ashyq sot ótkizýdi surady.
"Men aiyptaýdyń mánin jan-jaqty túsindim. Alaida taǵylǵan aiypty moiyndamaimyn", – dedi kúdikti sot zalynda.
Zańger Tileýjan Kishkenebaevtyń sózinshe, bul - jazany jeńildetý úshin jasalyp jatqan áreket.
"Ol "qasaqana istegen joqpyn" degen ýáj keltirip otyr. Iaǵni ol óziniń jazasyn jeńildetýdiń áreketine kóshti. "Óltiretin nietim bolǵan joq, ekeýmiz janjaldasqanymyzdyń saldarynan" degen sekildi keltirgisi kelip jatyr.
Tergeýde saraptamalar jasalady. Ol jerde nemen urǵany, qai jerine urǵany, adam neden qaitys bolǵany saraptama qorytyndysymen rastalady, bári zertteledi. Saraptama qorytyndysyna súiene otyryp, aiyp taǵady. Qazir adam óltirý deregi boiynsha taǵylǵan aiypty ol "adam óltiretin nietim bolǵan joq, abaisyzda" degenge keltirgisi kelip otyr. Óziniń basynyń amandyǵy úshin jazany jeńildetý áreketi. Kez kelgen sottalýshynyń isteitin áreketi ǵoi.
15 jyldan beri osyndai qylmystardy qarap kele jatyrmyz. Kóp sottalýshy "abaisyzda jasadyq" degen sekildi aitady. Al shyndyǵynda ol qandai zatpen ursa, qai jerinen ursa, jandy jerinen ursa, adam óletinin bildi", - deidi ol.
Al tanymal jýrnalist Gúlmira Ábiqai áleýmettik jelidegi paraqshasynda keshegi aldyn ala tyńdaýdy sot emes shoý dep atady.
"Sot emes shoý. Bishimbaevtyń sotyn tek baqylap otyrmyn, menen bólek milliondaǵan adam nazary osy sotta. Sot zalynda 100-den asa adam, press zalda ózimizdiń 80 jýrnalist taǵy bar. Degenmen, eń 1-shi otyrysta jurtty shý etkizgen 2 nárse boldy.
1) Bishimbaev: "Men bul aiyptaýlarmen kelispeimin, kinámdi moiyndamaimyn" dedi.
2) Bishimbaevtyń advokattary "Qylmystyq baptan asqan qatygezdikpen degendi alyp tastap, baiqaýsyzda degenge aýystyrý kerek" (dedi - esk.).
Shoý endi ǵana bastaldy, sot otyrysy áli uzaqqa sozylary anyq. Keshegi sotqa marqum Núkenovanyń týystaryn múldem qatystyrmady, zalǵa syimaisyńdar degen jeleýmen protsesti tek monitordan baqylady. Búgin atyshýly sot otyrysy 17:00 jalǵasady", - dep jazdy ol.
Eske salaiyq, byltyr Qýandyq Bishimbaev áieli Saltanat Núkenovany óltirdi degen kúdikpen qamaýǵa alynǵan edi. Oqiǵa 2023 jyly 9 qarashada Astana qalasyndaǵy BAU meiramhanasynda boldy.
