Qýandyq Bishimbaevqa qatysty sot otyrysynda oqiǵa bolǵan kúnniń videosy kórsetilip jatyr, - dep habarlaidy Dalanews.kz.
Buǵan deiin prokýror Bau meiramhanasynyń baqylaý kameralarynan, telefondardan jáne kóshedegi baqylaý kameralarynan barlyq videony kórý týraly ótinish bildirgen edi.
Al sotta kórsetilgen kadrda Bishimbaev pen Núkenovanyń meiramhanaǵa kirip kele jatqan sáti kórinedi. Al keiinirek saǵat 00.45-te olar meiramhanadan shyqqan sát kórinedi.
Sonymen qatar, olardyń kireberiste óte uzaq sóilesip turǵany da kórinetin kadrlar bar.
27 naýryzda eks-ministr Qýandyq Bishimbaevtyń isi boiynsha alqabiler tańdalǵan edi. Alqabiler alqasyna 12 adam irikteldi: 10 – negizgi quram, 2 – qosalqy. Sodan keiin ashyq sot otyrystary bastaldy.
Sonymen qatar, Qýandyq Bishimbaev sotta Saltanat Núkenovany asa qatygezdikpen óltirgenin moiyndamady. Bul oqiǵa 2023 jyly 9 qarashada Astana qalasyndaǵy BAU meiramhanasynda boldy.
Buǵan deiingi sózinde Bishimbaev dárethanada qandai oqiǵa bolǵanyn aitqan edi.
"Ol "maǵan bergen syilyqtaryńa ishiń ashityn shyǵar" dedi. "Olar maǵan nege kerek?" dedim. "Bárin qaitaramyn" dedi. "Qaitarýdyń qajeti joq, kerek bolmasa, laqtyryp tasta" dedim. Sol sátte oǵan ne bolǵanyn bilmeimin. Ol maǵan qarama-qarsy otyrdy. Meniń kózimshe syrǵasyn, neke júzigin, saǵatyn, bilezikterin sheshe bastady da, dárethanaǵa laqtyryp tastady. Bárin shyn júrekpen syilaǵanmyn. Men tańǵaldym, áreketterine qarap, sóilei almai qaldym. Ne isterimdi bilmedim. "Ishetin birdeńe ákeleiin" dep dárethanadan shyǵyp kettim. "Iá, alyp kel" dedi", - dedi ol.
Bishimbaevtyń aitýynsha, kelgen kezde esik jabyq ekenin kórgen.
"...Saltanat esikti ishten jaýyp alǵan, soqqynyń daýystary estilip jatty. Men esikti qaǵa bastadym. "Salta, Salta, esikti ash" dedim. Ol estimegen bolýy kerek. Men esikti judyryqpen soǵa bastadym. Ol júgirip kelip, esikti qaǵyp jatqanymdy estip, meni balaǵattai bastady. "Sen meni osyndai kúige jetkizdiń" dedi. Men túsinbedim. ...Mende de agressiia paida boldy. ...Men shtativti alyp, esikti ura bastadym. Sodan keiin esikte tesik paida boldy, keiin esikti ishten ashty. Ol meni balaǵattai bastady, men de ony boqtap aiǵailadym. Sóitip, janjal bastaldy, ol meni ura bastady, kóilegimdi jyrtyp jiberdi, men ony ustap alyp, iterip jiberdim, qabyrǵaǵa soǵyldy. "Sabyr saqta" dedim. Ol maǵan qaita kele jatqanda, men de onyń jeidesin jyrtyp jiberdim. Ol ashýlandy. Jeidesin sheship tastady. Onyń ústindegi kiimniń bári 8-i kúni tús kezinde kontsertke barar aldynda satyp alynǵan edi. Maǵan kiimderin laqtyra bastady. Men ony shapalaqpen uryp jiberdim, ol keiin shegindi. Bári óte tez boldy. Ol bir kezde "shalbarymdy da sheshemin" dedi. Men arqasynan ustap aldym", - dedi ol.
