Eks-ministr Qýandyq Bishimbaev isinde memlekettik aiyptaýshy bolǵan prokýror Aijan Aimaǵanova arty qaiǵyly jaitpen aiaqtalǵan taǵy bir turmystyq janjal týraly aitty, - dep habarlaidy Dalanews.kz.
Aimaǵanova turmystyq zorlyq-zombylyq sekildi áleýmettik qubylysty ashyq aitý qalypty jaǵdaiǵa ainalǵanyna oń pikir bildirdi.
"Meniń tájiribemde otbasylyq janjal qol jumsaýǵa ulasyp, biriniń (erli-zaiyptynyń - esk.) ólimimen aiaqtalǵan is boldy. Erli-zaiypty arasyndaǵy janjal asúide týyndaǵan, sol sátte áieli ústelde nan týrap jatqan. Janjal barysynda er adam ony ura bastaǵan. Qorǵanǵysy kelgen áieli jubaiynyń keýdesine pyshaq salyp, er adam sol jerde kóz jumǵan, al áieli sottaldy", - dedi prokýror.
Onyń aitýynsha, mundai qorqynyshty statistika, otbasylyq janjaldar búgingi qoǵamda az emes.
"Bul jaǵdaida zorlyq kórsetýshi ómirinen aiyryldy, al zorlyq-zombylyq qurbany ózin qutqara aldy. Biraq qandai baǵamen? Qoǵamnan oqshaýlaný baǵasymen jáne, ókinishke qarai, oqshaýlanýmen ǵana shektelgen joq. Zorlyq-zombylyq otbasylarda da, oqý oryndarynda da, esh jerde de bolmaýǵa tiis. Ár otbasynda balalar ósip keledi, olar ómirlerin óz otbasylarynyń úlgisimen qalyptastyrady. "Balalardy tárbieleme, ózińdi tárbiele". Eger árqaisymyz qorshaǵan ortaǵa bei-jai qaramasaq, onda kóp nárseni jaqsy jaqqa ózgertýge bolady. Bir-birińizge kóńil bólińizder, úlken janjaldardyń aldyn alyńyzdar", - dep keńes berdi Aimaǵanova qazaqstandyqtarǵa.
Buǵan deiingi suhbattarynyń birinde Bishimbaev isinde memlekettik aiyptaýshylar bolǵan Aimaǵanova men Nurbekov sýdiaǵa qandai usynys jasaǵandaryn aitqan edi.
Prokýror Nurbekovtiń sózinshe, Bishimbaevtyń buryn sotty bolǵanyn, onyń qylmysty masań kúide jasaǵanyn eskerip, 20 jyl, iaǵni eń joǵarǵy bas bostandyǵynan aiyrý jazasyn suraǵan. Al "Qorlaý" baby boiynsha eń joǵarǵy 7 jyl bas bostandyǵynan aiyrý jazasyn surap, túpkilikti jazalardy ishinara qosý arqyly 24 jylǵa bas bostandyǵynan aiyrý jazasyn usynǵan.
Sot sheshimimen eks-ministr Qýandyq Bishimbaev 24 jylǵa, al inisi Baqytjan Baijanov 4 jylǵa sottaldy.
