Burynǵy ulttyq ekonomika ministri Qýandyq Bishimbaevqa qatysty sot otyrysynda shymkenttik kóripkel kýálik etti, - dep habarlaidy Dalanews.kz.
Prokýror Aijan Aimaǵanova kóripkel jeke derekterin jariia etkisi kelmeitinin aityp, sot otyrysy barysynda sýdiadan onyń tek daýysy estilýine jaǵdai jasalýyn surady. Kóripkel ózine qysym jasalyp jatqanyn málimdegen.
Sot otyrysy barysynda kóripkel Bishimbaevty 1,5-2 jyldan beri anasy arqyly biletinin aitty.
"Eki aida bir ret qońyraý shalyp, jumysy, kásibi týraly suraityn. Men tarologpyn, ol birdeńe bilgisi kelse, "qarap kórińizshi" dep júginetin", - dedi ol.
Sonymen qatar, kóripkel marqum Saltanat Núkenova qaitys bolǵan kún týraly baiandap berdi.
"Ol habarlasty. Naqty ýaqyty esimde joq. Meniń qolym bos emes edi. Biraq tutqany kóterdim. Ol "Saltanat ekeýmiz qatty mas bolyp, tóbelestik" dedi. Bul shamamen tústen keiingi ýaqyt edi. 15.00-16.00 edi. Onyń ishimdik ishkeni baiqalyp turdy. Qatty mán bermedim. Ol "qarap berińizshi" dedi. Men "dárigerge habarlas, jedel járdem shaqyr" dedim. Ol "qaita-qaita qarap kórińizshi" dedi. Óte qysqa áńgime boldy. 30 sekýndtai. ..."Keshe qatty iship, qatty tóbelestik" dedi. "Men ne isteiin?" dedim. Daýysy kúndegidei emes edi, ár sózin tańdap aitty. Men "jedel járdemge habarlas" dedim", - deidi kýáger.
Kóripkeldiń sózinshe, Bishimbaev Saltanattyń uiyqtap jatqanyn, qoryldap jatqanyn aitqan. Sondai-aq, qozǵalmaitynyn, turmaitynyn, eshteńe iship-jemegenin jetkizgen.
Odan bólek kýáger Bishimbaev jeke qarym-qatynasyna qatysty máselede, otbasylyq taqyryptarda psiholog kómegine júgingenin aitty. "Óte ádemi ekenin, ony súietinin aitty (Bishimbaev Núkenova týraly - esk.)", - dedi ol.
Kóripkel jaýap berý kezinde Bishimbaevpen sóileskende birneshe ret "jedel járdemge habarlas" dep keńes bergenin qaitalady.
"Oǵan qaita-qaita "jedel járdem shaqyr, dárigerge bar" dedim. Ol mas bolatyn, birneshe ret qońyraý shaldy, men tutqany kótermedim. Ol "onyń jaǵdaiy jaqsy ekenin jazyńyzshy" dedi. Ol (Bishimbaev - esk.) ózi sondai, adamtózgisiz edi.
...Bir kezde "joq, ol esin jinaidy, qaidaǵy jedel járdem?" dedi. Men ony mas dep oiladym. Sodan keiin "ol qalai?" dep surady. Men oǵan "jedel járdem shaqyr, dárigerge bar" dedim. Osy sózderdi qaita-qaita aityp otyrdym. Ol qońyraý shalyp "jaǵdaiy óte jaman" dedi. Men "dárigerge baryńdar" dedim. Ol "birdeńe isteńizshi" dedi. Men ne istei alamyn? Birnárseni qaitalap, aiǵailai berdi. Men telefondy tastai saldym", - dedi shymkenttik kóripkel.
Aita keteiik, keshegi sot otyrysynda prokýror Bishimbaevtyń páterinen qan kórgen úi qyzmetshisinen, Núkenova qaitys bolǵan kúni Bishimbaev kezdesken bloger Gúlnar Nasyrbekovadan, sondai-aq, kóripkel Gúlnara Erejepovadan jaýap alý týraly ótinishin jetkizdi. Prokýror úi qyzmetshisi men kóripkelden onlain rejimde jaýap alynatynyn málimdedi. Sýdia ótinishti qanaǵattandyrdy.
Sonymen qatar, keshe Saltanat qaitys bolǵan túni Qýandyq Bishimbaevpen sóilesken bloger Gúlnara Nasyrbekova sotta kýálik etti.
Onyń sózinshe, Bishimbaev ekeýi golf klýbtyń múshesi eken.
"Bishimbaev 3 qarashada meni golf oinaýǵa shaqyrdy. (...) Biraq 8 qarashada kezdesemiz dep sheshtik. Artynsha 9 qarashada kezdesemiz dep sheshtik. Men keshke qurbylarymmen monshaǵa baratyndyqtan, 9 qarashada tústen kezdesemiz dedik", - deidi Gúlnara Nasyrbekova.
Artynsha Gúlnara taksige tapsyrys berip, BAU meiramhanasyna kelgen.
"Ortalyq esik jabyq turdy. Habarlastym, ol (Bishimbaev - esk.) ashana jaqtan shyǵyp, vip-bólme jaqqa apardy. Bastapqyda týrnir týraly sóilese bastadyq. Meniń blogym, jarnama týraly surai bastady. Negizi jarnama jasamaitynmyn. Meniń qyzym bar, onyń óziniń blogy bar. "Biz qyzyńyzben jumys istep kórsek" dedi. Muny estip birtúrli bolyp qaldym", - deidi bloger.
Onyń sózinshe, olar áńgimelesip otyrǵan kezde Bishimbaev birneshe ret syrtqa shyǵyp kelgen.
