Sýdia Aijan Kúlbaeva Saltanat Núkenovanyń ólimine qatysty máskeýlik mamandar júrgizgen saraptama nátijesin is materialdaryna qosý týraly ótinishti qanaǵattandyrmady, - dep habarlaidy Dalanews.kz.
Sýdia qosymsha saraptama jasalatyny týraly sotqa, prokýrorlarǵa ýaqtyly habar berilmegenin jáne saraptama zańdy buza otyryp jasalǵanyn aitty.
16 sáýirde ótken sot otyrysynda Qýandyq Bishimbaevtyń advokattary reseilik mamandardyń saraptama nátijesin birneshe saǵat boiy oqyp shyqqan bolatyn. Saraptamada Saltanat Núkenovanyń ólimine ol qaiǵyly oqiǵa bolardan 3-4 apta buryn alǵan jaraqaty sebep bolǵanyn aitylǵan edi. Alaida bul saraptama qorytyndysy almatylyq mamandar jasaǵan saraptama nátijesine qaishy bolǵan.
Bishimbaevtyń qorǵaýshylary máskeýlik mamandarmen jeke sot meditsinalyq saraptama jasatqan bolatyn. Alaida olardyń bul bastamasy týraly quzyrly organdar beihabar bolǵan. Saraptama qorytyndysy jalǵan bolyp shyqqan jaǵdaida saraptama jasaǵan máskeýlik mamandardy jaýapqa tartý múmkin emes. Bul týraly prokýror aitqan bolatyn. Onyń bul pikirin jábirlenýshi tarap ta qoldaǵan edi.
Eske salaiyq, Bishimbaevqa qatysty kezekti sot otyrysynda aiyptalýshynyń advokattary reseilik sot-meditsinalyq sarapshylarynyń Saltanattyń ólimine bailanysty shyǵarǵan sheshimin oqydy. Bishimbaevtyń advokattary sotta Máskeý qalasyndaǵy "N.I. Pirogov atyndaǵy Resei ulttyq zertteý meditsinalyq ýniversitetiniń" reseilik sot-meditsinalyq sarapshylarynyń qorytyndysyn baiandady.
Osy tusta reseilik sarapshylar qazaqstandyq mamandardyń sózin joqqa shyǵardy. Aitýlarynsha, Núkenova bas miynyń aýyr jaraqaty saldarynan qaitys bolmaǵan. Buǵan Saltanattyń ólimine deiin 3-4 apta buryn alǵan eski gematomadan basta qan ketýi sebep boldy desedi.
Al 9 sáýirde almatylyq sot-meditsina eksperti Tahir Halimnazarov protsess barysynda maneken arqyly marqum Saltanat Núkenovanyń ólimine qandai jaraqattar sebep bolǵanyn kórsetti.
Tahir Halimnazarov sot otyrysy barysynda sýdianyń suraqtaryna da jaýap berdi.
"Qarapaiym sózben aitsaq, basyna soqqy jasaǵanymen qosa, jábirlenýshini qylǵyndyrǵan ba?" - dedi sýdia.
Al sarapshy belgileri baryn aitty.
Artynsha sýdia "marqumnyń basyna kem degende 12-13 ret soqqy jasalyp, odan keiin qylǵyndyrǵan ba, durys pa?" dep naqtylady.
"Múmkin. Iá (moinynan qylǵyndyrǵan ba degen suraqqa jaýap - esk.)", - dedi ekspert.
Buǵan deiin sarapshy bul jaraqattar Núkenovanyń máiitin saraptaý nátijesinde anyqtalǵanyn aitqan edi.
Onyń sózinshe, munyń bári jalpylama bas jaraqaty bolyp sanalady. Oǵan betindegi jaraqattar da, bas súiegindegi jaraqattar da jatady.
