Buqaralyq aqparat quraldarynda áielin uryp óltirdi degen aiyp taǵylyp otyrǵan eks-ministr Qýandyq Bishimbaevtyń isi boiynsha alqabilerge úmitkerlerge habarlama jiberilip jatqany týraly aqparat tarady, - dep habarlaidy Dalanews.kz.
Press.kz basylymy málimetinshe, 300 adam alqabilerdi irikteýge shaqyrylǵany týraly habarlama alǵan, ol jabyq rejimde ótedi.
"Bul týraly bizge aqparat kózderi habarlady. Onyń ishinde sońǵy quramǵa tek 12 adam kiredi", - dep jazdy arna.
Aldyn ala tyńdaýda sýdia Aijan Qulbaeva sottalýshy Bishimbaevtyń ótinishi qanaǵattandyrylatynyn, iaǵni bul iske alqabiler de qatysatynyn málimdegen edi. Al Májilis depýtaty, zańger Abzal Quspan qoǵamdaǵy alqabilerge qatysty alańdaýshylyqqa eshqandai sebep joq ekenin málimdedi.
"Meniń oiymsha, alańdaýǵa eshqandai negiz joq. Nege? Alqabiler degenimiz - ol da osy qoǵamnyń ókili. Bul jerde kásibi sýdia qatysady. On sýdianyń biri - kásibi sýdia, qalǵany alqabiler quramynda. Suraǵyńyzdyń tórkininde sybailas jemqorlyqqa aparyp soqtyrmai ma, qandai da bir jolmen satyp alý degen sózdi aityp otyrsyz. Bir adamdy satyp alǵan ońai ma, on adamdy satyp alǵan ońai ma? Qarapaiym suraq. Bir sýdiaǵa senbeitin bolsaq, alqabilerge de senbeitin bolsaq, úkimdi kim shyǵarýy kerek? Qoǵamnyń nazarynda bolǵandyqtan, ádiletti sot aktisi shyǵatynyna óz basym tolyq senemin", - dedi ol.
Aita keteiik, sot Qýandyq Bishimbaevtyń isin prokýrorǵa qaitarýdan bas tartty.
Eske salaiyq, byltyr Qýandyq Bishimbaev áieli Saltanat Núkenovany óltirdi degen kúdikpen qamaýǵa alynǵan edi. Oqiǵa 2023 jyly 9 qarashada Astana qalasyndaǵy BAU meiramhanasynda boldy.
